Mu isiganwa Tour de France, kuri uyu wa gatatu tariki ya 07 Nyakanga 2021 hakinwaga agace ka 11, agace kegukanywe n’Umubiligi Wout Van Aert ubwo bavaga Sorgues berekeza Malaucenes, Tadej Pogacar agumana umwambaro w’umuhondo.
Sorgues-Malaucenes, urugendo rungana na kilometero 198 na metero 900. Byasabye umubiligi Wout Van Aert wa Jumbo Visma igihe kingana n’amasaha 5 iminota 17 n’amasegonda 43 kugirango yegukanye aka gace bityo yandika amateka yo kwegukana agace kambere muri iri siganwa rimaze iminsi 12 rikinwa.
Ku mwanya wa 2 haje umufaransa Kenny Elissonde ukinira Treg Segafredo wakoresheje igihe kingana n’amasaha 5, iminota 18 n’amasegonda 58 (5h18’58’’); mu gihe ku mwanya wa gatatu haje Umuholandi Bouke Mollema bakina mu ikipe imwe ndetse bakaba banganyije ibihe.
Abamaze gukoresha ibihe bike bayobowe na Tadej Pogacar wa UAE Team Emirates umaze gukoresha igihe kingana n’amasaha 38 iminota 25 n’amasegonda 17 (38H25’17’’) ; agakurikirwa na Rigoberto Uran wa EF Education Nippo, umaze gukoresha amasaha 38 iminota 30 n’amasegonda 35 (38H30’35’’) ; mu gihe ku mwanya wa gatatu haza Jonas Vingegaard wa Jumbo Visma umaze gukoresha amasaha 38 iminota 36 n’amasegonda 2 (38H36’02’’).
Kuri uyu wa kane abasiganwa barahaguruka Saint Paul, banyure mu mugi wa Trois berekeza Chateareau. Ni urugendo ruresha na kilomereto 159 na metero 400 (159,4KM).
