Sir Keir Starmer avuga ko azava ku mwanya w’umukuru w’ishyaka rya Labour no ku wa Minisitiri w’intebe w’Ubwongereza, nyuma yo kwemera ko ishyaka rye ritemera ko ari we uri mu mwanya mwiza cyane wo kuyobora iki gihugu kugeza ku matora rusange ataha.
Mu ijambo yavuze kuri uyu wa mbere hanze y’ibiro bye bya No 10 Downing Street, Minisitiri w’intebe yavuze ko icyemezo cyose yafashe ari ku butegetsi cyari kigamije “gushyira imbere iki gihugu nkunda”.
Keir Starmer, byagaragaraga ko afite imbamutima ubwo yavugaga iryo jambo, yashimiye umugore we Victoria “w’igitangaza”, avuga ko yamubereye “urutare” ndetse avuga ko ashaka kuba “umupapa mwiza cyane ushoboka ku bana beza bacu”.
Ikigiye gukurikiraho ni uko Starmer azaguma muri uwo mwanya kugeza ishyaka rya Labour rihisemo umukuru mushya waryo. Yasabye urwego ruyobora ishyaka gukora ku buryo ibyo biba “mbere yuko Inteko ishingamategeko igaruka mu mirimo mu kwezi kwa cyenda, Nzeri 2026.”
Andy Burnham ushobora gusimbura Minisitiri w’intebe, kuri uyu wa mbere araza kuba ari i Westminster aho leta ikorera, rwagati mu murwa mukuru London, kugira ngo arahizwe nka Depite uhagarariye akarere ka Makerfield, ko mu majyaruguru ashyira uburengerazuba bw’igihugu, nyuma yuko atsinze amatora yo kuziba icyuho cy’ubuyobozi bwako yabaye mu cyumweru gishize.
Burnham yemeje ko azahatanira kumusimbura, anashimira Keir kuri byinshi cyane yakoreye igihugu no ku bw’ubuyobozi bwe n’ubwitange “mu gihe kigoye”. (BBC)
