Guverinoma y’u Rwanda yihanganishije abacuruzi n’abandi bose bagizweho ingaruka n’inkongi y’umuriro yibasiye isoko rikuru rya Musanze rizwi nka GOICO ryahiye ku mugoroba wo ku wa Gatandatu tariki 10 Ukwakira 2026 kugeza mu gitondo cyo ku Cyumweru tariki 11 Ukwakira 2026.
Mu itangazo ryasohotse ku gicamunsi cyo kuri iki Cyumweru tariki 11 Ukwakira 2026, Minisiteri y’Ubutegetsi bw’Igihugu yatangaje ko abantu babiri bakomeretse byoroheje, abandi 15 bahungabanywa n’iyi nkongi y’umuriro.
Iri tangazo rivuga ko iperereza ku cyateye iyi nkongi rikomeje, inizeza ubufatanye mu gusana iri soko kugira ngo ibikorwa by’ubucuruzi bisubukurwe.
Isoko rikuru rya Musanze rizwi nka GOICO ni rimwe mu masoko manini yari mu Rwanda. Ryari ryafunguwe muri 2017 ritwaye akayabo ka Miliyari 7.5 z’amafaranga y’u Rwanda.
