Madame Jeanette Kagame yayoboye igikorwa cyo gutaha ‘Imbuto Hubs’ iherereye i Nyamata mu karere ka Bugesera, ikaba yarubatswe ku bufatanye bw’Akarere ka Bugesera n’Umuryango Imbuto Foundation.
Muri Imbuto Hubs, hakorerwa ibikorwa bitandukanye, bifasha urubyiruko, birimo iby’imyitozo ngororamubiri nka karate, umupira w’amaguru, imikino y’amaboko nka basketball, handball no kubyina Kinyarwanda.
Hari n’ibindi bitandukanye, birimo isomero, Irerero ry’abana, n’ahandi higishirizwa imyuga itandukanye irimo ubudozi, kogosha, gusuka n’ibindi bikorwa by’ubwiza bw’abakobwa hakabamo n’icyumba cyagenewe ubujyanama ku buzima n’imibereho myiza.
Ni igikorwa remezo cyagenewe urubyiruko, ariko hari n’abari mu zabukuru baza kuhakorera imyitozo ngororamubiri mu masaha y’umugoroba, bagakora ibijyanye n’intege nke zabo, ariko bakahananurira imitsi, bakanahura bagasabana, bikabarinda kwigunga no kugira irungu.
