Ikigo gicuruza Internet mu Rwanda, Broadband Systems Corporation (BSC), kigiye kubaka ububiko bw’amakuru bugezweho mu Rwanda ku bufatanye n’Ikigo cy’Ikoranabuhanga gitanga serivisi z’ububiko bw’amakuru cya Oman Data Park cyo muri Oman.
Bikubiye mu masezerano Oman Data Park na BSC byasinye ku wa 23 Gicurasi 2026 ari mu murongo mugari wa Minisiteri y’Ikoranabuhanga na Inovasiyo y’u Rwanda n’iya Oman.
Ibi bigo byashyize umukono ku masezerano agamije kwakira ikigo cy’amakuru y’ikoranabuhanga, serivisi zo kubika amakuru mu buryo bwagutse, kubaka ibikorwa remezo by’ikoranabuhanga no kwimakaza ikoranabuhanga ry’Ubwenge Muntu Buhangano (AI).
Ni ububiko bw’amakuru bwo ku rwego rwo hejuru buzwi nka ‘A Tier III AI-ready data centre’ bufite ubushobozi bwo gutunganya amakuru menshi kandi yizewe mu gihe gito.
Ni ububiko butajya buvaho, ku buryo bushobora gukomeza gukora kabone n’iyo bwaba buri gutunganywa cyangwa kwagurwa.
Bwubakwa mu buryo bugezweho ku buryo amakuru aboneka amasaha 24 ku yandi kandi bukishingikirizwaho ku kigero cya 99.982%.
Buba bufite ubushobozi kandi bwo gukoresha porogaramu za mudasobwa zihambaye zishingiye kuri porogaramu y’ubwenge buhangano, izifasha gusesengura amakuru mu gihe gito n’ibindi.
Ni amasezerano agaragaza uburyo u Rwanda rukomeje gutera intambwe mu bijyanye no kwimakaza ikoranabuhanga rigezweho.
Oman Data Park yagiranye amasezerano na BSC ni ikigo gikomeye kiri mu Murwa Mukuru wa Oman, Muscat, cyashinzwe mu 2012. Cyateye imbere kiza guhinduka ikigo kinini ndetse kiri mu bya mbere bikomeye mu Burasirazuba bwo Hagati.
Umuhango wo gushyira umukono kuri aya masezerano witabiriwe n’abayobozi batandukanye barimo Minisitiri w’Ikoranabuhanga na Inovasiyo, Ingabire Paula n’Umunyamabanga wa Leta muri iyi minisiteri, Yves Iradukunda n’Umuyobozi Mukuru w’Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA), Antoine Sebera.
Ni umushinga ugaragaza uburyo u Rwanda rukomeye kuri gahunda yarwo yo kuba igicumbi cy’ikoranabuhanga mu Karere no kwimakaza ubukungu burishingiyeho, hubakwa ibikorwaremezo bigezweho.
Ibi bizanafasha kandi mu kwagura ishoramari mu ikoranabuhanga rigezweho nk’irya AI no kubaka ibikorwaremezo by’ikoranabuhanga mu Karere.
Broadband Systems Corporation ni ikigo gicururiza internet mu Rwanda kuva mu 2008 aho gifite ubushobozi bwo kuyigeza mu turere twose tw’Igihugu.
Kimaze kubaka imuyoboro ya fibre optique ingana n’ibilometero 8000 mu bice bitandukanye by’u Rwanda, igatanga internet mu mashuri, mu bigo by’ubuvuzi, ibigo bya leta n’iby’abikorera.
Ni mu gihe Oman Data Park ari ikigo gicunga ububiko bw’amakuru bwo ku rwego rwo hejuru kikanatanga serivisi zibushingiyeho kuva mu myaka 14 ishize, kigaha serivisi ibigo bibarirwa mu magana zishingiye kuri serivisi z’ikoranabuhanga.
Uyu mushinga ni intambwe ikomeye ituma hubakwa porogaramu za mudasobwa zihambaye zishingiye kuri AI, no gufasha izindi za leta z’ingenzi gukora nta mpungenge, kuko amakuru asesengurwa mu gihe gito serivisi zigatangwa byihuse.
Ibi bizafasha kandi u Rwanda kugira ububiko bw’amakuru bwo ku rwego mpuzamahanga, ibizarufasha kugabanya kwishingikiriza ku bw’ibigo byo mu mahanga.
Ibi bizanatuma ibigo by’ikoranabuhanga bikomeye mu Isi bishora imari mu mishinga itandukanye y’ikoranabuhanga mu Rwanda kuko ruzaba rufite ububiko bw’amakuru buhambaye.
U Rwanda rukomeje inzira yo kwihaza mu bijyanye n’ububiko bw’amakuru. Minisitiri Ingabire Paula aherutse gutangaza ko urwego rw’ibigo bibika amakuru rutera imbere ku rugero rwa 35% buri mwaka ndetse ko u Rwanda ruri gukorana n’abafatanyabikorwa mu gukomeza kwagura uru rwego.
Yavuze ko u Rwanda rushaka gushora imari ya miliyari 5$ mu bubiko bw’amakuru bukoresha megawatt 100 z’ingufu. Ati “Ni ha handi ushobora kwizera ko wabona miliyoni 220$ ku mwaka. Imibare irivugira. Ni gute twakwemeza abashoramari bagakora ishoramari nk’iri?”
Aya masezerano yasinywe ari mu murongo w’umubano mwiza u Rwanda na Oman bifitanye mu nzego zitandukanye.
Muri Mutarama 2026 byasinye amasezerano ane y’ubufatanye arimo ibirebana na serivisi zo gutwara ibicuruzwa, ibihugu byombi byiyemeza gufatanya kubaka icyambu cyo ku butaka ndetse no gutangiza ibikorwa byacyo, bikajyana no kubaka uruhererekane rwa serivisi z’ubwikorezi bw’ibicuruzwa.
Mu bwikorezi bwo mu kirere, ibihugu byombi byasinye amasezerano atuma Sosiyete y’Ubwikorezi bwo mu Kirere ya Oman (Oman Air) ibona amahirwe yo gutangiza ingendo zihuza Kigali na Muscat muri Kamena uyu mwaka.
Mu birebana n’iterambere, Urwego rw’u Rwanda rw’Iterambere (RDB) n’Ikigo gishinzwe gucunga Ibibuga by’Indege muri Oman basinye amasezerano agena ishoramari rizakorwa ahazengurutse Ikibuga Mpuzamahanga cya Kigali cy’i Bugesera. (Igihe)
