Amakuru ava mu Ishami ry’Umuryango w’Abibumbye ryita ku buzima ku mugabane wa Afrika arahamya ko igihugu cya Tanzania ubu cyavuye ku izima, kikaba cyemeye kwinjira muri gahunda ya COVAX igamije gusaranganya inkingo za covid 19 ku rwego rw’isi.
Ibi bije nyuma yuko uwahoze ari Perezida w’iki gihugu bwana Pombe Magufuli wari uzwiho gukerensa cyane icyorezo cya Covid 19 ndetse no kutemera ibijyanye n’urukingo aherutse kwitaba Imana.
Nubwo ubuyobozi bushya muri iki gihugu bwakomeje kwerekana ko burajwe ishinga no gushyira imbaraga mu kurwanya no gukumira iki cyorezo, Tanzania iracyari mu bihugu bine bya Afrika bitari byatangiza na mba gahunda yo gukingira COVID 19, nkuko bitangazwa n’ihuriro ry’ibigo nyafurika bishinzwe kurwanya ngo gukimira indwara.
Richard Mihigo, umwe mu bakozi b’ishami ry’umuryango w’abibumbye ryita ku buzima yatangarije ibiro ntaramakuru by’Abongereza Reuters dukesha iyi nkuru ko inkingo za mbere zo muri gahunda ya COVAX zizasesekara muri Tanzania mu gihe kitarenze ibyumweru bibiri.
Ni mu gihe kandi ngo hateganijwe inama izahuza ubuyobozi bwa Tanzania n’imiryango itandukanye nka UNICEF, WHO n’iyindi, izaba igamije gutegura no gushyira mu bikorwa gahunda y’ikingira rya Covid 19 muri kiriya gihugu.
Umuyobozi w’ishami ry’umuryango w’Abibumbye ryita ku buzima muri Afrika Matshidiso Moeti yasabye Tanzania kongera gutanga amakuru n’imibare ijyanye na Covid 19; nk’abanduye, abahitanwe nayo n’ibindi kugira ngo aya makuru yifashishwe mu kureba uko iki cyorezo cyaranduka burundu. Tanzania yaherukaga gutanga amakuru n’imibare irebana na covid muri Gicurasi 2020.
