Urwego Ngenzuramikorere, RURA, rwatangaje ibiciro bishya by’ibikomoka kuri peteroli, aho litiro ya lisansi yageze kuri 2303 Frw, aho yiyongereyeho 314 Frw, mu gihe litiro ya mazutu yageze kuri 2205 Frw, bivuze ko yiyongereyeho 257 Frw.
Ibiciro by’ibikomoka kuri peteroli byaherukaga guhindurwa ku wa 4 Werurwe 2026, aho litiro ya lisansi yari kuri 1.989 Frw, mu gihe iya mazutu yageze yageze kuri 1.948 Frw
Itangazo ryashyizwe hanze kuri uyu wa Gatanu tariki 03 Mata 2026 rigaragaza ko kuva kuri uyu wa Gatandatu tariki 04 Mata 2026 saa kumi n’ebyiri za mugitondo (06:00), hazatangira gukurikizwa ibiciro bishya ku bikomoka kuri peteroli.
Iri tangazo rigira riti: “Abaturarwanda barasabwa guteganya neza ingendo zabo, gukoresha imodoka zitwara abagenzi mu buryo bwa rusange no kwirinda ingendo zitari ngombwa, hagamijwe kugabanya ikoreshwa ry’ibikomoka kuri peteroli.”
RURA yatangaje ko impinduka mu biciro zatumye hanavugururwa igiciro fatizo cy’ingendo mu bwikorezi rusange. Mu mu mujyi wa Kigali umugenzi azajya yishyura 59,28 Frw kuri kilometero imwe mu gihe abajya mu ntara, umugenzi azajya yishyura 41,58 Frw kuri kilometero imwe.
Kugeza uyu munsi tariki 03 Mata 2026, igiciro cy’akagunguru ka lisansi idatunganyije ku isoko mpuzamahanga cyari kigeze ku madorali ya Amerika 112,4. Intambara ishyamiranyije Leta Zunze Ubumwe za Amerika, Israel na Iran imaze ukwezi itangiye yafunze umuhora wa Hormuz unyuramo 20% by’ibikomoka kuri peteroli bikoreshwa ku Isi buri munsi.
Iran ivuga ko ari yo ifite uburenganzira bwo kugenzura uyu muhora wa Hormuz, ndetse yahashyize imbunda za missile, drones n’izindi ntwaro ku buryo ari yo igena ubwato bushobora gutambuka n’ubutabyemerewe.
Minisitiri w’Intebe Dr. Justin Nsengiyumva kuri uyu wa Gatanu tariki 03 Mata 2026 mu kiganiro n’itangazamakuru yahishuye ko iki kibazo kiri kugira ingaruka ku bukungu bw’u Rwanda. Ati: “Kiriya kibazo kiri kugira ingaruka mu bubahirane mpuzamahanga cyane cyane ku bijyanye n’ingufu n’ubwikorezi, bikaba byaramaze kugira ingaruka zigaragara ku biciro, ku isoko mpuzamahanga cyane cyane ku biciro by’ibikomoka kuri peteroli na gaz.”
Yasobanuye ko ku Rwanda iyi ntambara iri kugira ingaruka ku bicuruzwa byoherezwa mu mahanga aho zimwe mu nzira zamaze gufungwa zirimo nk’ibyoherezwaga muri Leta Zunze Ubumwe z’Abarabu.
Uburyo bwa kabiri ni ubujyanye n’ibyo rutumiza mu mahanga, aho ibiciro byazamutse ku isoko mpuzamahanga bityo no mu Rwanda bitazabura kuzamuka.
Ati: “Izo ni ingaruka turi kubona zishobora kuzaba ku bukungu bw’igihugu cyacu. Biteganyijwe ko bizagira ingaruka ku bukungu bw’Isi muri rusange, aho biteganyijwe ko bizava kuri 3,3% bikamanuka bikagera kuri 2,7%. Bizagira ingaruka kandi ku bwiyongere bw’ibiciro ku isoko mu Rwanda, bisobanuye ko bizagira ingaruka hafi kuri buri Munyarwanda wese. Tugomba kwitegura rero ariko tudakangaranye.”
RURA yahamije ko ibiciro bishya byashyizweho hashingiwe ku mpinduka ziri ku isoko mpuzamahanga ry’ibikomoka kuri peteroli, ndetse n’ingamba Leta y’u Rwanda yafashe mu guhangana n’ingaruka z’impinduka zigenda ziyongera ku rwego rw’Isi (Igihe).
