Amizero
Ahabanza Amakuru Hanze Politike Ubutabera

Kenya: Uhuru Kenyatta yavuze ko yiteguye guhererekanya ubutegetsi mu mahoro.

Perezida ucyuye igihe muri  Kenya, Uhuru Kenyatta ku nshuro ya mbere yagize icyo avuga ku byavuye mu matora yo mu kwezi gushize, ntiyigeze avuga uwatsinze William Ruto mu izina cyangwa ngo amushime ko yatsinze.

Kenyatta yari ashyigikiye Raila Odinga wari uhanganye na visi perezida we Ruto, gusa Ruto yatsinze Raila amurusha amajwi macye, kuwa mbere tariki 05 Nzeri 2022 iyi ntsinzi yemejwe n’Urukiko rw’Ikirenga ko ifite ishingiro nyuma y’ikirego cya Raila Odinga.

Mu ijambo rye, Kenyatta yagize ati: “Mu gukomeza ibyo nemeye mfata uyu mwanya ko nzashyira imbere ubutegetsi bugendera ku mategeko, niyemeje gushyira mu ngiro amategeko y’urukiko uko yanditse”.

Kenyatta yizeje abanyakenya ko hazabaho guhererekanya ubutegetsi mu mahoro. Ati: “Igikorwa cyo guhererekanya ubutegetsi cyaratangiye…Ndifuza kuyobora ugusimburana mu mahoro mpa ubutegetsi bukurikiyeho.”

Mu ijambo yavuze ubona ko atuje hari aho yumvikanye nk’unenga icyemezo cy’Urukiko rw’Ikirenga cyo kuwa mbere.

Yagize ati: “Kuko demokarasi ari urugendo rukomeje ndasaba igihugu kubaha inzego zibyaye abategetsi bacu bashya…Ndasaba kandi abaturage ko buri gihe bahora bazigenzura kuko izi ari inshingano za buri muturage wa Kenya.”

Yakomeje yibaza niba Urukiko rw’Ikirenga rwarakoze uko bikwiye kuva mu myaka ishize. Mu 2017 uru rukiko rwatesheje agaciro intsinzi ye Kenyatta ubwe.

Yagize ati: “Ese inzego zacu zishobora guca urubanza gutya mu matora amwe nyuma rugaca urundi kuriya mu yandi matora hatabayeho kubigenzura? Ndasaba abanyakenya gukomeza kuba maso kandi mu by’ukuri bagakomeza kubaza inzego ibyo zishinzwe.”

Ubwo yajyaga ku butegetsi byavuzwe ko Uhuru Kenyatta yumvikanye na visi perezida William Ruto ko azamushyigikira akamusimbura manda ye irangiye.

Gusa kuva mu 2018 Kenyatta yatangiye kwegerana n’uwahoze ari mucyeba we Raila Odinga, ndetse mu kwiyamamaza yumvikanye avuga ko Ruto atari “umuntu wo kwizerwa” ku mwanya wa perezida.

Ruto yatsinze aya matora mu buryo bwatunguye aba bacyeba be, nyuma y’uko yiyegereje cyane abaturage basanzwe bo hasi nk’uko byanditswe na BBC.

Biteganyijwe Uhuru Kenyatta agomba kumushyikiriza ubutegetsi mu gihe kitarenze iminsi irindwi uhereye nyuma y’umwanzuro w’Urukiko rw’Ikirenga.

Related posts

Musanze: Hanenzwe abagore biyambuye isura y’ububyeyi bakijandika mu kwica Abatutsi.

NDAGIJIMANA Flavien

Imyitwarire ya Kim Jong Un, kimwe mu bihangayikishije Yoon Seok-youl, Perezida mushya wa Koreya y’Epfo.

NDAGIJIMANA Flavien

Abajura bishe bunyamaswa abaturage barenga 200 mu Majyaruguru ya Nigeria.

NDAGIJIMANA Flavien

Leave a Comment