Amizero
Ahabanza Amakuru Politike Ubukerarugendo Ubukungu

Gutembereza abantu mu kirere hakoresheje imitaka byatangijwe mu Rwanda.

Urwego rw’Iterambere mu Rwanda, RDB, rufatanyije n’Ikigo Royal Balloon Rwanda, byatangije serivisi zo gutembereza abantu mu kirere, hifashishijwe imitaka minini izwi nka ‘Hot Air Balloon’.

RDB yatangaje ko kuri uyu wa 19 Mutarama 2022, aribwo hatangijwe uyu mushinga ugiye gukorera muri Pariki y’Ighihugu y’Akagera iherereye mu Burasirazuba bw’u Rwanda.

Mu Rwanda iki kigo cyahashyize imitaka ibiri, aho umwe munini ufite ubushobozi bwo gutwara abantu bane undi ukagira ubwo gutwara batandatu icya rimwe.

Hot Air Ballon zifite ubushobozi bwo kuzamuka mu kirere zikagera muri metero ziri hagati ya 100 na 1000.

Umuyobozi Mukuru wa RDB, Claire Akamanzi, yavuze ko u Rwanda rwishimiye kugira uyu mushinga kuko uje wiyongera ku zindi mbaraga zikomeje gushyirwa mu kubaka urwego rw’ubukerarugendo rukomeye.

Ati “Twishimiye gufatanya na Royal Balloon ku kongera undi mushinga ushimishije mu bukerarugendo bw’u Rwanda.”

Yakomeje agira ati “Twiteguye gukomeza gushaka abandi bafatanyabikorwa bashya kugira ngo tugire ishoramari rihagije mu rwego rw’ubukerarugendo.”

Ikigo Royal Balloon gikomoka muri Turikiya, gisanzwe kizobereye mu gutanga izi serivisi aho kiri mu bya mbere ku Isi mu bigo bifite ubunyamwuga buhambaye muri ubu bwoko bw’ubukerarugendo.

Umuyobozi wa Royal Balloon Rwanda, yavuze ko bishimiye gukorana na Pariki y’Igihugu y’Akagera mu gutangiza uyu mushinga kandi ari iby’agaciro.

Ati “Twishimiye gukorana n’Ikigo Akagera Management Company no gutangiza ibikorwa bya Hot Air Ballon muri Pariki y’Akagera. Uru ni urugero rwiza rw’uko kubungabunga urusobe rw’ibinyabuzima bishobora guhindura imibereho y’abaruturiye.”

Yakomeje agira ati “Twizeye ko mu kuzana iki gikorwa gishya mu bukerarugendo bizatanga umusanzu mu kubaka urwego rw’ubukerarugendo mu Rwanda.”

Kuba Pariki y’Akagera izabona ikigo gitanga serivisi zo gutembereza abayisura muri balloon ni ikintu gikomeye, kuko ari ibintu bisanzwe mu zindi pariki zikomeye mu bihugu nka Kenya, Tanzania, Zambia na Afurika y’Epfo.

Bifasha abasuye izi pariki kureba inyamaswa bazisanze aho ziri kandi bakazireba mu buryo bwose bashaka, abafata amafoto nabo bakaboneraho umwanya.

Bitewe n’uko nta bapilote bazi gutwara balloon bari mu Rwanda, abaturutse muri Turikiya nibo bazatangira batanga izi serivisi, mu gihe Abanyarwanda nabo bazaba bari kwiga uko zitwarwa, amasomo azabatwara imyaka ibiri.

Umuyobozi wa Pariki y’Igihugu y’Akagera, Ladis Ndahiriwe yavuze ko kuba iyi pariki yungutse iyi mitaka bizongera agaciro kayo ndetse bigakurura ba mukerarugendo.

Ati “Kugendera muri iyi mitaka ya Hot Air Ballon bizaha abasura Pariki y’Akagera ibyishimo bidasanzwe kandi bigire uruhare mu kwinjiza amafaranga afasha mu kubungabunga urusobe rw’ibinyabuzima biri muri pariki.”

Yakomeje agira ati “N’abaturage by’umwihariko abaturiye pariki bazahabwa imirimo mishya kandi binjize n’amafaranga.”

Byitezwe ko urugendo rwa balloon mu Rwanda ruzajya rufata hagati y’iminota 40 ndetse na 75.

Bijyanye n’ikirere ndetse n’imiyaga yo mu Rwanda, Royal Balloon irateganya kuzajya itanga serivisi zayo hagati y’iminsi 200 na 300 ku mwaka, ikigero cyiza ugereranyije n’uko bimeze ahandi.

Imikorere ya Hot Air Ballon

Hot Air Balloon ni imitaka itemberezwa mu kirere irimo abantu, ariko ikaba itagira moteri cyangwa ikindi gikoresho kiyifasha kuguma mu kirere, ahubwo ikifashisha umuyaga usanzwe n’umwuka ushyushye.

Kugira ngo balloon iguruke, ibanza gushyirwamo umwuka usanzwe, ukuzura umutaka munini (cyangwa ikimeze nk’igipirizo kinini tubona kiba kiri hejuru).

Mu buryo balloon zikozemo, ziba zifite uburyo bwateganyijwe bwo kohereza ubushyushye muri wa mutaka urimo umwuka, hanyuma uko umwuka urimo imbere urushaho gushyuha, uriyegeranya umutaka ukabyimba kurushaho, noneho kuko umwuka ushyushye woroha kurusha umwuka usanzwe (uba unakonje), uhita uzamuka usa nk’ujya hejuru yawo, maze ubwo balloon ikaba irazamutse.

Mu kirere, umuyobozi wayo (bita pilot) ashobora kugena ubutumburuke agurutsaho balloon ye, akoresheje bwa buryo bwo kohereza ubushyushye muri balloon nyine, ari na bwo bushyushya umwuka urimo imbere. Uko umwuka uri mu mutaka urushaho gushyuha cyane, ni na ko uba uri koroha cyane, bigatuma balloon izamuka cyane.

Ku kijyanye n’amerekezo, umupiloti wa balloon ashobora kuyagenzura, ariko ibi biterwa n’umuvuduko w’umuyaga uri mu kirere. Uko uba mwinshi, ni ko kugenzura balloon bigorana.

Ku bijyanye no kururuka, umupiloti wa balloon ashobora guhagarika kohereza ubushyushye muri balloon, maze uko umwuka urimo imbere ugenda ukonja gahoro gahoro, balloon ikagenda imanuka. Iyo aramutse ashatse kumanuka balloon vuba, wenda nk’ikirere gihindutse kuko balloon zitaguruka mu mvura cyangwa mu muyaga mwinshi, pilote aba afite ubushobozi bwo gufungura igice cyo hejuru cy’umutaka, ubundi umwuka ushyushye ugasohokamo vuba, maze nayo ikamanuka vuba.

Inkuru ya IGIHE.

Related posts

Umuhanzikazi Sifa Josée yasohoye amashusho y’indirimbo ‘We kwiheba’ asaba abantu guturiza mu Mana [VIDEO]

NDAGIJIMANA Flavien

Perezida wa Tanzania John Pombe Magufuli yitabye Imana nyuma y’igihe bivugwa ko arembye bikitwa ibihuha.

NDAGIJIMANA Flavien

DRCongo: Leta yatangaje ko nta Ebola ikirangwa mu Gihugu.

NDAGIJIMANA Flavien

Leave a Comment