Imibare ya buri munsi ya Minisiteri y’Ubuzima mu Rwanda, MINISANTE, yerekanye ko abantu batandatu bahitanywe na Coronavirus mu Rwanda kuri uyu wa Mbere tariki 23 Kanama 2021, bituma umubare w’abamaze kwicwa n’iki cyorezo ugera kuri 1027 mu gihe abanduye kuri uyu munsi ari 496.
MINISANTE yatangaje ko abarwayi bishwe na Coronavirus kuri uyu wa Mbere, tariki ya 23 Kanama 2021, ari abagore batanu n’umugabo umwe.
Abarwayi bashya 496, bangana n’ijanisha rya 6% babonetse mu bipimo 8.251 byafashwe mu masaha 24 yashize.
Kuri uyu munsi kandi abarwayi basezerewe mu bitaro ni 11, abagera kuri 15 ni bo babyinjijwemo mu gihe umubare w’abarembye umaze kugera kuri 43.
Kugeza ubu mu Rwanda hamaze gukingirwa mu buryo bwuzuye [ni ukuvuga abahawe dose zombi] abantu 432.429 kuva ibi bikorwa byatangira ku wa 5 Werurwe 2021. Abantu 1.092.466 ni bo bamaze guhabwa dose imwe y’urukingo barimo na 43.826 bayifashe kuri uyu wa Mbere.
