Tour de France : Nils Politt yegukanye agace ka 12 (Videos)

Mu isiganwa Tour de France, kuri uyu wa kane tariki ya 08 Nyakanga 2021, Umudage Nils Politt yegukanye agace ka 12 ubwo abasiganwa bavaga St Paul berekeza Nimes, Tadej Pogacar akomeza kuba umwami w’irushanwa.

Saint-Paul-Trois-Châteaux-Nîmes, ni urugendo rungana na kilomereto 159 na metero 400 (159,4KM). Uru rugendo rwo muri aka gace k’imirambi yo mu majyepfo y’Ubufaransa, rwasabye Umudage Nils Politt wegukanye aka gace igihe kingana n’amasaha 3 iminota 22 n’amasegonda 12 (3H22’12’’) kugira ngo akore amateka yo kwegukana agace ka mbere muri iri rushanwa rigeze ku munsi waryo wa 13.

Babiri bamugwa mu ntege ni Imanol Erviti wa Movistar, urushwa igihe kingana n’amasegonda 31 (+31s) ndetse na Harry Sweeny wa Lotto Soudal waje ku mwanya wa gatatu, akaba anganya ibihe na Imanol Erviti wegukanye umwanya wa kabiri.

Abamaze gukoresha ibihe bike bayobowe na Tadej Pogacar wa UAE Team Emirates umaze gukoresha igihe kingana n’amasaha 47 iminota 23 n’amasegonda 43 (47H23’43’’) , agakurikirwa na Rigoberto Uran wa EF Education Nippo urushwa igihe kingana n’ iminota 5 n’amasegonda 18 (+05’18’’), mu gihe ku mwanya wa gatatu haza Jonas Vingegaard wa Jumbo Visma urushwa iminota 5 n’amasegonda 32 (+05’32’’).

Kuri uyu wa gatanu abasiganwa barahaguruka Nimes, berekeza Carcassonne, urugendo rureshya na kilomereto 219 na metero 900 (219,9KM), akaba ariko gace ka 2 mu burebure (nyuma y’agace ka 7: 249,1KM) mu duce 21 tugize iri rushanwa.