Libani ivuga ko umutwe wa Hezbollah, ufashwa na Iran, wemeye gahunda ya Leta Zunze Ubumwe za Amerika yuko uhagarika ibitero kuri Israel ndetse na Israel igahagarika ibitero ku murwa mukuru Beirut wa Liban.
Ambasade ya Liban muri Leta Zunze Ubumwe za Amerika yavuze ko yakiriye ukwemera kwa Hezbollah kw’icyifuzo cya Amerika cyo guhagarika ibitero ku mpande zombi.
Minisitiri w’intebe wa Israel Benjamin Netanyahu yemeje ayo masezerano, ariko aburira ko ibitero kuri Beirut bizakomeza “niba Hezbollah idahagaritse kugaba ibitero ku mijyi yacu no ku basivile”.
Ayo matangazo yagiye ahagaragara nyuma yuko Perezida wa Amerika Donald Trump avuganye na Netanyahu hamwe n’abahagarariye Hezbollah ndetse bemeranya ko kurasa kose kuzahagarara.
Ibi bigezweho nyuma yuko Iran iburiye ko ibikorwa by’ingabo za Israel muri Liban biteje inkeke ku gahenge kariho ubu hagati ya Leta Zunze Ubumwe za Amerika na Iran.
Mu itangazo yasohoye ku mugoroba wo ku wa mbere, Ambasade ya Liban yavuze ko muri ubu buryo bwifujwe, ibitero bya Israel ku nkengero zo mu majyepfo ya Beirut bizahagarara nk’ingurane yuko Hezbollah [na yo] yifashe ku kugaba ibitero kuri Israel.
Yongeyeho ko ako gahenge kagiye kongerwa kajyemo n’ubutaka bwose bwa Libani, ariko nyine ibi bikazaterwa n’uko Hezbollah nayo izitwara kuko Israel itangaza ko idashobora kwihanganira ubushotoranyi ubwo ari bwo bwose.
Minisitiri w’Intebe Netanyahu yagize ati: “Icyarimwe, IDF [ingabo za Israel] izakomeza gukorera mu majyepfo ya Liban nkuko byari biteganyijwe.”
Nyuma yuko Trump avuze ko impande zombi zemeranyije guhagarika imirwano, hari ugukozanyaho kwakomeje.
Hezbollah yavuze ko yagabye ibitero bitatu ku bifaru bya Israel no ku basirikare bayo hafi y’ibyaro bibiri byo mu majyaruguru ya Israel, ikoresheje indege nto z’intambara zitajyamo umupilote (drone) hamwe n’urukurikirane rw’ibisasu bya rutura.
Ingabo za Israel zavuze ko zasamye ibisasu bibiri byari byarasiwe muri Libani. Nta bakomeretse batangajwe. (BBC)
