Kuri uyu wa Gatatu tariki 01 Gashyantare 2023, Perezida wa Repubulika Paul Kagame ari kumwe na Madame Jeannette Kagame bunamiye Intwari z’u Rwanda bashyira indabo ku kimenyetso cy’ubutwari cyubatse ku Gicumbi cy’Intwari i Remera mu Mujyi wa Kigali.
Ni mu muhango wo kwizihiza ku nshuro ya 29 Umunsi w’Intwari z’Igihugu wizihizwa tariki 01 Gashyantare buri mwaka.
Mu butumwa bujyanye n’uyu munsi, Perezida Kagame yagize ati: “Mu gihe duhanganye n’ibibazo bifite aho bihuriye n’akarere duherereyemo ndetse n’Isi muri rusange, uyu munsi uratwibutsa ubushobozi bwacu bwo guhagarara ku kuri, kurinda Igihugu cyacu, no kubaka umurage w’iterambere ku badukomokaho n’ababakomokaho”.
Undi washyize indabo ku kimenyetso cy’ubutwari ni Ambasaderi wa Repubulika ya Congo Brazzaville mu Rwanda, Guy Nestor Itoua ari nawe uhagarariye bagenzi be bahagarariye Ibihugu byabo n’Imiryango mpuzamahanga mu Rwanda.
Nyuma y’uwo muhango abagize imiryango y’intwari zibukwa uyu munsi nabo bashyize indabo ku kimenyetso cy’Intwari.
Kuri iyi nshuro ya 29 u Rwanda rwizihiza Umunsi w’Intwari, insanganyamatsiko yawo ni “Ubutwari bw’Abanyarwanda, agaciro kacu.”
Ibikorwa byo kwizihiza uyu munsi bikaba byabereye kandi hirya no hino mu Turere tugize Igihugu ndetse no muri Diaspora.
