Ubuyobozi bwa Kiliziya Gatolika mu Gihugu cya Tanzania bwatangaje ko mu minsi 60 imaze gupfusha abapadiri barenga 25, ababikira 60 ndetse n’abalayiki bakuze babiri bazize kunanirwa guhumeka.
Umunyamabanga w’Inama y’Abepisikopi muri Tanzania, TEC Charles Kitima yavuze ko Kiliziya Gatolika yapfushije aba bantu mu mezi abiri gusa.
Ibi Charles Kitima yabigarutseho kuri uyu wa Gatatu mu kiganiro yagiranye n’abanyamakuru cyagarutse cyane ku cyorezo cya Covid-19. Yavuze ko izi mfu zose zagaragaye kuva hagati mu kwezi k’Ukuboza 2020 na Gashyantare 2021.
Padiri Kitima yavuze ko Kiliziya itemerewe gupima Covid-19 mu mavuriro yayo 500.
Charles Kitima yasabye abantu gukomeza kwirinda. Yagize ati: “Mukomeze kubahiriza ingamba zo kwirinda icyorezo binyuze mu kubahiriza amabwiriza ya Minisiteri y’Ubuzima. Abapadiri n’ababikira bari gupfa ariko mu mezi abiri uyu mubare natwe waradutunguye by’umwihariko dushingiye ku kuba Guverinoma yarashyize imbaraga mu nzego z’ubuzima”.
Kugeza ubu Kiliziya Gatolika muri Tanzania yamaze gutanga amabwiriza ku bapadiri n’abasenyeri bo muri diyosezi zitandukanye ajyanye n’uko bakwiye kwirinda COVID-19.
Bubaye ubwa kabiri Kiliziya Gatorika itanga impuruza ko yaba yibasiwe cyane na Coronavirus mu gihugu cya Tanzania, ivuga ko mu kwezi kwa mbere yari yabonye ukwiyongera gukabije kw’abapfa mu ma paruwase yayo.
Kuva muri Gicurasi 2020, Tanzania nta mibare ijyanye na Covid-19 kuko kuva icyo gihe byatangajwe ko nta cyorezo kikirangwa muri iki gihugu.
Ishami rya ONU ryita ku buzima OMS/WHO rimaze gusaba kenshi iki gihugu kugaragaza imibare ijyanye na Covid-19 no guhindura inyifato ku bijyanye n’iki cyorezo harimo nk’iby’inkingo zikomeje gukwirakwizwa binyuze muri gahunda ya Covax.
BBC
