Amizero
Ahabanza Amakuru Ubuzima

Rutsiro: Umwana umaze imyaka 12 afashwe n’indwara idasanzwe aratabarizwa.

Hagumirema Déogratias wo mu Kagari ka Nkora, Umurenge wa Kigeyo mu Karere ka Rutsiro, aratabariza umwana we umaze imyaka 12 afashwe n’indwara idasanzwe, aho bagerageje kumuvuza hose hashoboka ngo ariko ubushobozi bwabo bukarangira adakize.

Uyu mwana w’umukobwa wiga mu mwaka wa kabiri w’amashuri abanza, yitwa Imanifashe Divine, akaba bucura mu bana batatu, aho mu myaka 12 amaze avutse ngo abaho mu buzima bw’ububabare bukabije, ngo gutora agatotsi bikaba ihurizo kuri we.

Hagumirema aganira na Kigali Today dukesha iyi nkuru yavuze ko umwana yavutse ari muzima nta kibazo afite, amaze amezi atatu batangira kubona uduheri duto, uko iminsi ishira ngo twagiye dukwirakwira umubiri wose.

Avuga ko babonye ubwo burwayi bukomeza gukura batekereza kumuvuza mu mavuriro yoroheje ndetse babonye byanze bagana n’ubuvuzi bwa Kinyarwanda bunyuranye ariko ngo biba iby’ubusa uburwayi bukomeza kwiyongera.

Ngo yageze aho afata umwanzuro wo kumujyanaga mu bitaro bya Murunda nabo bagerageza gufasha uwo mwana ariko uburwayi burakomera aho uruhu rwe rwari rwamaze kwangirika cyane ku buryo rwageze aho rugira igisa n’amagaragamba.

Ati: “Mu bitaro bya Murunda bakomeje gufasha uwo mwana ariko ntibyagira icyo bitanga, uruhu rwari rwarajeho ibishishwa bimeze nk’amagaragamba bakagenda babishishura, bimwe bikavaho ibindi ntibiveho, bansaba kumujyana muri CHUK”.

Ngo muri icyo gihe umwana yoherezwaga mu bitaro bya CHUK, uwo mubyeyi ntibyamukundiye kujyayo aho nawe yahise arwara mu nda baramubaga imbaraga n’ubushobozi birabura, kuvuza umwana birahagarara.

Ati: “Ibitaro bya Murunda byatwohereje CHUK, mfatwa n’indwara yo mu nda barambaga ndetse n’ubushobozi buba bucye, ubwo biranga ahasigaye nkajya ngura amavuta gusa yo kumusiga”.

Amavuta yabugenewe niyo yonyine atuma abona agahenge.

Uwo mwana ngo abona agahenge iyo asizwe amavuta atumizwa mu bitaro bikuru bya Gisirikare bya Kanombe, aho amacupa atatu akoreshwa mu gihe cy’ukwezi agura amafaranga ibihumbi 24 nk’uko uwo mubyeyi abivuga.

Ati: “Hari amavuta bandangiye mu bitaro bya Kanombe tumusiga akabona agahenge, ubundi iyo twamwogeje tukayamusiga ntabwo byongera kumurya cyane. Hari umuntu njya ntuma akajya mu bitaro kunzanira ayo mavuta aho buri kwezi dutanga amafaranga ibihumbi 24 yo kuyagura”.

Uwo mubyeyi, avuga ko nubwo iyo ndwara iteye ubwoba ngo hari ubwo ibyo bintu bimeze nk’amagaragamba bishishutse isura ye ikagaragara, akaba ariho ahera avuga ko aramutse abonye ubushobozi uwo mwana akanyuzwa mu cyuma indwara ikagaragara ishobora kuvurwa igakira.

Ashimira ubuyobozi bw’Umurenge wa Kigeyo bwamuhaye inkunga y’amafaranga ibihumbi 30 y’itike imujyana kugura ayo mavuta asigwa umwana, agashimira n’abandi bagiraneza bishyize hamwe nk’itsinda bakusanyije amafaranga ibihumbi 50 yo kugura amavuta.

Abandi bagiraneza avuga ko bakomeje kumuba hafi ngo ni Caritas ya Paruwasi ya Biruyi n’iyo ku Kavumu, aho bakomeje kumusura bamugenera n’ubundi bufasha.

Uburwayi bwateje umuryango ubukene bukabije

Hagumirema avuga ko mu myaka itatu uwo mwana afashwe n’uburwayi, ngo yari amaze kugurisha udusambu tune yari yaraguze, aho ngo ubu umuryango ubayeho mu bukene bukabije.

Ati: “Uyu mwana yagize imyaka itatu miliyoni n’igice yaragiye cyera, kuko nagurishije uturima tune nari naraguze none urareba agize imyaka ingana ityo urumva hasigaye iki, kandi yaratangiye kurwara afite amezi atatu! Hari aho najyaga bakansha ibihumbi 100, ahandi ibihumbi 70 ahandi 50, ni mu bavuzi gakondo aho banyizezaga ko bamushobora bagenda bayajyana bayajyana”.

Arongera ati: “Ikindi cyamazeho imitungo, ni amavuta namusigaga anyuranye kandi ahenze cyane, ayo bambwiye yose ngura aya bitanu, ay’icumi nkajya ngenda musiga sincike intege kugeza ubwo nshiriwe burundu, nkajya nirirwa njya gushakisha ntera ibiraka. Gusa nyuma nanjye nararwaye biba ikibazo, iyo amavuta yabuze biruma akishimagura bikagenda bicikamo ibisebe ari nako agira uburibwe bukabije”.

Abana ku ishuri bigeze kumuha akato.

Uyu mubyeyi avuga ko abana bigana bagiye bamubona bakikanga bagashaka kumukubita, ariko abonye bikomeje kuba ibibazo ajya ku ishuri kubitekerereza abarimu, aho ngo kuva icyo kihe akato kahagaze umwana yiga neza.

Avuga ko uwo mwana iyo yabonye amavuta uburibwe bukagabanuka ajya kwiga, kandi ngo yitwara neza dore ko ngo atarenga mu myanya 15 ya mbere.

Arasaba ubufasha kugirango umwana avurwe.

Uyu mubyeyi arasaba Leta y’u Rwanda ubufasha, buri wese wagira umutima utabara kugira ngo uwo mwana ajyanwe mu bitaro bifite ubushobozi, anyuzwe mu cyuma hamenyekane indwara arwaye aho kugeza ubu itazwi.

Uwakenera kumuvugisha ku bufasha ubwo aribwo bwose yamubona kuri: 0785358690

Ati: “Leta ni umubyeyi turayisaba ubufasha ndetse n’abandi bafite umutima utabara badufashe rwose turebe ko twarengera ubuzima bw’uyu mwana kuko arababaye cyane kandi twe nta kintu namba tukigira, iyo arira turi kumwe mu gihe amavuta yashize binkora ahantu nkabura uko mbigenza, kandi hari ikimenyetso kigaragaza ko ubu burwayi bwitaweho bwakira”.

Umubiri w’uyu mwana wuzuye amagaragamba/Photo Internet

Kigali Today

Related posts

Umunya-Colombia Vergara Sanchez yegukanye agace ka mbere ka Tour du Rwanda

NDAGIJIMANA Flavien

Nyabugogo: Yamanutse mu igorofa ya gatanu ahita apfa

NDAGIJIMANA Flavien

COVID 19: Impinduka mu ngamba zo guhashya iki cyorezo

NDAGIJIMANA Flavien

1 comment

Kabeza Jean March 11, 2021 at 7:43 PM

Ubuyobozi baakarere buri uriyamuturage wabo ntibyumva koko bamufashe Dore konabshyira munyiciro wasanga baramukubise kuri C skaters nimutabare uriya muturage wacu

Reply

Leave a Comment