Amizero
Ahabanza Amakuru Hanze Politike

DRC: FARDC yisubije ahantu hose hari hafashwe n’inyeshyamba.

Ingabo za leta ya Repubulika Iharanira Demokarasi ya Congo zafashe uduce twose twari twigaruriwe n’inyeshyamba zishyize hamwe muri teritwari ya Masisi mu Ntara ya Kivu ya ruguru, nk’uko umuvugizi w’ingabo abivuga.

Ahagana mu mpera z’icyumweru gishize, inyeshyamba zarateye zigarurira uduce twa Muheto, Gatovu, Mpati, Kirumbu n’ahandi muri Masisi, bituma abaturage babarirwa mu bihumbi bava mu byabo.

Ibinyamakuru muri DR Congo bivuga ko ibi bitero byagabwe n’inyeshyamba zishyize hamwe za APCLS-Nyatura n’umutwe w’inyeshyamba urwanya ubutegetsi bw’u Rwanda wa FDLR.

Kuwa gatandatu no ku cyumweru utu duce twaranzwemo imirwano ikomeye, ingabo za FARDC zivuga ko ubu yarangiye zitsinze iryo shyirahamwe ry’inyeshyamba.

Kuri uyu wa mbere tariki 12 Mata 2021, Major Ndjike Kaiko umuvugizi wa FARDC muri Kivu ya Ruguru yabwiye BBC ko ubu ibintu bimeze neza. Yagize ati: “Ibintu ubu biratuje, ahantu hose haragenzurwa n’ingabo za leta FARDC. Twigaruriye ahantu hose hari hafashwe n’ubufatanye bw’inyeshyamba za APCLS – Nyatura na FDLR, twafashe n’ibirindiro byabo ari naho umwanzi yari ashingiye”.

Yongeraho ati: “Ahantu nka Bukombo ni ahantu umwanzi yari amaze imyaka 15 ategeka, ahantu nka Mpati, Kivuye ubundi ni état-major y’ubwo bufatanye bw’inyeshyamba, ariko uyu munsi Bukombo n’aho hose haragenzurwa na FARDC.”

Uvuga ko yitwa Cure Ngoma, umuvugizi w’umutwe wa FDLR, yabwiye BBC ko abarwanyi bawo batari mu bitero bivugwa, we yemeza ko nta barwanyi ba FDLR bari mu gace kavugwamo imirwano.

Ibikorwa byo kurandura imitwe y’inyeshyamba myinshi – irimo n’irwanya ubutegetsi bw’ibihugu bituranyi, bisa n’ibyananiranye muri ako gace.Shemsa Malengure umuturage w’ahitwa Nyabiondo wahunze kuwa kane w’icyumweru gishize n’abana be bane bagahungira i Goma, yabwiye BBC ko ingabo zabarindaga nazo zari zimaze guhunga inyeshyamba.

Ati: “Nta kindi kindi kiba gisigaye iyo ubonye abasirikare bahunze. Twasize ibyacu ntituzi niba hari icyo tuzasanga”.

Major Kaiko avuga ko ubu ako gace hari amahoro, ati: “Turi guhamagarira abategetsi n’abakuriye rubanda guhamagarira abaturage gusubira mu turere twabo kuko ubu ntacyo gutinya kigihari.”

Ntihazwi neza umubare w’abantu baguye muri iyi mirwano, Kaiko nawe avuga ko iyo mibare itaraboneka, gusa yemeza ko hari inyeshyamba n’intwaro zazo zishyikirije ingabo za leta.

Mu 2019 Perezida Félix Tshisekedi yavuze ko hatangiye “ibitero bigari” bya gisirikare bigamije kurandura imitwe y’inyeshyamba mu burasirazuba bwa DR Congo.

Major Kaiko avuga ko ibyo bitero bigari byo kurandura inyeshyamba bikomeje, nubwo avuga ko bitoroshye.

Ati: “Ibyo bitero n’ubu birakomeje ariko abantu bagomba kumva uko ibintu bimeze muri Kivu ya ruguru, umwanzi afite amayeri agoye, umwanzi ari muri rubanda abana na rubanda, rero dukoresha uburyo bushoboka bwo kugira ngo ibikorwa byacu ntibigire ingaruka ku baturage bacu.”

Related posts

Ihumure ku bagenzi benshi bari ahategerwa imodoka muri Nyabugogo, Nyagatare n’ahandi mu Gihugu.

NDAGIJIMANA Flavien

BASKETBALL: IPRC Musanze yakoze imyitozo yanyuma itegura imikino 3 yo muri iyi weekend (Amafoto)

Shyaka Josbert

Imikino Olempike: Kugwa akarambarara ntibyamubujije kurangiza isiganwa ari uwa mbere

Shyaka Josbert

Leave a Comment