Perezida Yoweri Kaguta Museveni yarahiriye kongera kuyobora Igihugu cya Uganda muri manda ya karindwi y’imyaka itanu, izasoza mu 2031, akaba yaratangiye kuyobora icyo gihugu kuva mu 1986.
Museveni w’imyaka 81 yatsinze amatora yabaye ku wa 15 Mutarama 2026 ku majwi 7.946.772 ahwanye na 71,6% by’amajwi yose. Yatsinze abakandida umunani barimo Robert Kyagulanyi Ssentamu uzwi nka Bobi Wine wo mu ishyaka National Unity Platform (NUP), na Nathan Nandala Mafabi wo mu ishyaka Forum for Democratic Change (FDC).
Umuhango w’irahira rya Museveni witabiriwe n’abakuru b’ibihugu na za Guverinoma bagera kuri 35, n’abaturage baturutse imihanda yose basaga ibihumbi mirongo ine (40.000) bahuriye kuri Kololo Ceremonial Grounds.
Yoweri Kaguta Museveni yafashe ubutegetsi tariki ya 26 Mutarama 1986, akuyeho umutwe wa gisirikare wari uyobowe na Jenerali Tito Okello Lutwa nyuma yuko ingabo za NRA (National Resistance Army) zihiritse guverinoma ya Okello yari imaze amezi atandatu gusa nyuma yo guhirika ubuyobozi bwa kabiri bw’umunyagitugu Milton Obote.
Mu bayobozi bitabiriye irahira rya Perezida Yoweli Kaguta Museveni, barimo Perezida Salva Kiir Mayardit wa Repubulika ya Sudani y’Epfo na Félix Antoine Tshisekedi wa Repubulika ya Demokarasi ya Congo. U Rwanda rwahagarariwe na Minisitiri w’Intebe Dr. Justin Nsengiyumva.
