Perezida wa Leta Zunze Ubumwe za Amerika, Donald Trump, yavuze ko agahenge kashyizweho mu ntambara ya Amerika na Iran kari mu marembere nyuma y’ibyo Iran yayisubije ku mushinga wo guhagarika intambara.
Yabitangaje kuri uyu wa mbere tariki 11 Gicurasi 2026, nyuma yo kubazwa n’abanyamakuru uko abona iby’amasezerano bihagaze.
Yagize ati: “Ubu navuga ko [ibyerekeye agahenge] biri ahantu habi, nyuma yo gusoma umwanda batwohereje, ntanubwo nigeze ndangiza kubisoma.”
Perezida Donald Trump yashimangiye ko aka gahenge kameze nk’umurwayi uri mu minsi ye ya nyuma ageze mu gihe cyo kongererwa umwuka.
Ibi bibaye mu gihe Iran yatanze ibisubizo byayo ku wa 10 Gicurasi 2026 ku busabe Amerika yari yayihaye, byavugaga ku ntambara zose zirimo n’iyo muri Liban, aho Israel ihanganye na Hezbollah.
Iran yasabye ko kugira ngo yumvikane na Amerika, Washington ikwiriye kubanza kwishyura ibyangijwe muri Iran ndetse ishinga agati no ku busugire bwayo ku nzira ya Hormuz.
Tehran kandi yasabye Amerika ko igomba guhagarika inzitizi zashyizweho n’igisirikare cyayo kirwanira mu mazi, ikemeza ko itazongera gutera Iran ndetse igakuraho ibihano yafatiye Iran ku bijyanye no gucuruza ibikomoka kuri peteroli n’ibindi.
Hashize amasaha make Trump yamaganye ubu busabe bwa Iran avuga atabwemera ndetse atabwihanganira. Iran yo yavuze ko yizeraga ko ibyo yasabye ku guhagarika intambara bikwiriye.
