Ikipe ya Al Ahli Tripoli ikinamo abanyarwanda Manzi Thierry na Bizimana Djihad, yaraye itwaye igikombe cya Shampiona ya Libya itsinze Al Hilal Benghazi ibitego 2-0.
Wari umukino wagombaga gutanga igikombe ku mpande z’amakipe yombi kubera ko zagiye guhura, Al Ahli Tripoli ifite amanota 10 naho Al Hilal Benghazi yo yari ifite amanota 8. Al Ahli Tripoli yinjiye mu mukino isabwa kunganya naho Al Hilal Benghazi yo yasabwaga gutsinda.
Uyu mukino watangiye saa moya n’igice z’umugoroba. Ntibyatinze kuko Manzi Thierry yari yamaze gutsinda igitego ku munota wa 5. Igice cya mbere cyarangiye nta gihindutse maze umukino ugana ku musozo ku munota 83 El Houni aza kubonera Al Ahli Tripoli igitego cya 2.
Ikipe ya Manzi Thierry na Bizimana Djihad utagaragaye kuri uyu mukino yegukanye Igikombe cya Shampion ya Libya ifite amanota 13 ikurikiwe na Al Hilal Benghazi yasozanyije amanota 8. Izi kipe nizo zahise zinabona itike yo guhagararira Libya mu mikino ya CAF Champions League.
Uyu mukino ntiwakiniwe igihe kuko wari uteganyijwe ku Cyumweru, uza gusubikwa bitewe n’uko ubwo aya makipe yombi yageraga ku kibuga yasanze nta Koranabunga rya Videwo rifasha Abasifuzi (VAR) ryari rihari.
Iyi mikino ya kamarampaka ari nayo yatanze igikombe, yari imaze iminsi iri kubera mu mujyi w’i Millan mu Butaliyani, yatangiye tariki 25 Nyakanga 2025 yari yitabiriwe n’amakipe 6 ari yo Al-Ahly Benghazi, Al-Hilal Benghazi, Al-Akhdar, Al-Ahly Tripoli, Al-Sweihly na Al-Ittihad.
