Ubushinwa bwakomeje imyitozo ya gisirikare ku munsi wa kabiri bukorera hafi y’ikirwa cya Tayiwani kuri iki Cyumweru tariki 09 Mata 2023. Muri iyi myitozo harakoreshwa indege z’intambara n’ubwato rutura bw’intambara.
Iyi myitonzo Ubushinwa bwatangiye kuwa gatandatu tariki 08 Mata 2023, izarangira ejo ku wa mbere tariki 10 Mata 2023. Ni imyitozo yagaragaye nk’uburyo Ubushinwa bwashatse kwerekana ko butishimiye kuba Perezida wa Tayiwani yakiriwe na Perezida w’Inteko Ishinga Amategeko ya Reta Zunze Ubumwe za Amerika, umutwe w’abedepite, Kevin McCarthy.
Igisirikare cy’Ubushinwa cyatangaje ko iyi myitozo, amarondo n’ibindi bikorwa bya gisirikare gikorera hafi ya Tayiwani, ari uburyo bwo kwihaniza bushimitse abo bwise ‘abahezanguni bashyigikiye ubwigenge bwa Tayiwani, ubufatanye n’ukwenderanya kw’ingufu ziturutse hanze’
Igisirikare cy’Ubushinwa kiravuga ko ibi bikorwa ari ngombwa mu rwego rwo kurinda ubusugire bw’Ubushinwa n’ubutavogerwa bw’imipaka yabwo.
Ministeri y’ingabo ya Tayiwani yatangaje ko ejo ku wa gatandatu ubwato umunani bw’igisirikare cy’Ubushinwa n’indege 42 z’igisirikare cyabwo byagaragaye hafi y’icyo kirwa, ndetse zimwe muri izo ndege zikarenga umurongo w’urugabano icyo kirwa gihana n’umugabane.
Perezida Tsai Ing-wen wa Tayiwani yamaganye iyo myitozo avuga ko Tayiwani izakomeza gukorana na Leta zunze ubumwe za Amerika n’ibindi Bihugu bishyigikiye demokarasi muri iki gihe icyo kirwa gikomeje guhangana n’icyo yise ‘gushaka kwiyagura hakoreshejwe igitugu bikomeje kuranga Ubushinwa’.
