Abasirikare barindwi bo mu Gisirikare cya Repubulika Iharanira Demokarasi ya Congo, FARDC bakatiwe urwo gupfa n’urukiko rwa Gisirikare rwateraniye i Sake ejo kuwa Gatandatu tariki 11 Gashyantare 2023 rubahamije ibyaha birimo ubugwari no guca igikuba muri rubanda.
Uru rukiko rwa gisirikare rwa Goma rwateraniye i Sake muri Teritwari ya Masisi muri Kilometero 25 mu Burengerazuba bw’Umujyi wa Goma, nyuma y’igikuba cyacitse kuwa Kane abaturage bagahunga bikanga ko M23 igiye gufata Sake.
Umwe mu banyamakuru bitabiriye iri buranisha yabwiye BBC ko aba basirikare, bari bafite abunganizi, bahamijwe ibyaha by’ubugwari, guca igikuba, gukomeretsa no gutagaguza amasasu.
Umushinjacyaha wa gisirikare yumvikana arega aba basirikare guta urugamba n’ubugwari imbere y’umwanzi (M23), bakagenda barasa nta mpamvu mu gace ka Sake na Mubambiro.
Mu guhunga kwabo, aba basirikare ngo baciye igikuba muri rubanda rwa Sake maze nabo bahungira i Goma na Minova, mu gihe nyamara Sake ikigenzurwa n’ingabo za Leta, FARDC.
Aba basirikare b’ipeti rya kaporali bahakanye ibyaha, kandi ababunganira bavuzeko bazajuririra igihano abakiriya babo bakatiwe, nk’uko ubutegetsi bw’Intara ya Kivu ya Ruguru bwabitangaje.
Kuwa kane, mu mirwano ishyamiranyije ingabo za Leta n’umutwe wa M23 mu nkenegero za Sake, abatuye uyu Mujyi muto benshi barahunze bakeka ko M23 yawinjiyemo, bivugwa ko ibi byatewe n’abo basirikare ubwo bahanyuraga bataye urugamba bahunga.
Umushinjacyaha yavuze ko muri uko guhunga mu bwoba n’igikuba kwa rubanda abantu babiri bapfuye abandi bane bagakomereka, ari nayo mpamvu yareze aba basirikare ubwicanyi no gukomeretsa.
Mu kwezi kwa 11 umwaka ushize, urukiko rwa gisirikare rwa Goma rwakatiye abandi basirikare batatu urwo gupfa rubahamije guhunga urugamba barwana na M23 bagaca igikuba muri rubanda rwahise ruhungira mu nkambi ya Kanyarucinya.
Repubulika Iharanira Demokarasi ya Congo iracyatanga igihano cy’urupfu kuko kikiri mu mategeko yayo ariko giheruka gushyirwa mu bikorwa mu 2003.
Imirwano hagati ya M23 n’ingabo za Leta imaze gutuma abantu babarirwa mu bihumbi amagana bata ingo zabo bagahunga.
Ejo kuwa Gatandatu, umuvugizi wa M23 yatangaje ko bari mu nkengero za Sake naho umuvugizi w’ingabo mu ntara ya Kivu ya Ruguru, Lt Col Ndjike Kaiko avuga ko basubije inyuma M23 kure ya Sake.
