Uburusiya bwatangaje ko bugiye gutangira gukoresha intwaro nshya zigezweho zihanura indege zitagira abapilote (drones) mu ntambara burwana na Ukraine.
Uburusiya bwatangaje ibi ubwo hari intwaro kabuhariwe zaturukagayo mu buryo bw’ibanga zijyanwa mu ntambara burwanamo na Ukraine.
Ibiro ntaramakuru by’Abongereza, Reuters, byatangaje amakuru ko burya indege nyinshi za Ukraine zitagira abapilote zahanurwaga n’ubu bwoko bw’intwaro nshya.
Nta kintu kinini kugeza ubu kizwi ku buryo izi ntwaro nshya zaba zikoreshwa. Gusa muri 2018, Perezida Vladimir Putin, w’Uburusiya yari yashyize ahagaragara imbunda nshya kabuhariwe. Muri zo harimo za misile za (ballistic missile) zambukiranya imigabane, indege zitagira abapilote zigendera mu mazi n’izindi nyinshi.
Uretse kuba zica, izi ntwaro ngo zishobora no gutera ubuhumyi. Ibi byashimangiwe n’uwungirije Ministiri w’Intebe w’Uburusiya mu kiganiro kuri Televiziyo. Yemeye ko izi ntwaro zitwa Zadira zikoreshwa koko mu ntambara burwanamo na Ukraine.
