Urukiko rwisumbuye rwa Gasabo rwemeje ko Kalisa Adolphe uzwi nka “Camarade”, wahoze ari Umunyamabanga mukuru w’ishyirahamwe ry’umupira w’amaguru mu Rwanda (FERWAFA), agomba gukomeza gufungwa by’agateganyo mu gihe cy’iminsi 30.
Ubu ni nyuma y’uko ubujurire yari yatanze bwasuzumwe bugateshwa agaciro. Kalisa akurikiranyweho ibyaha bibiri birimo kunyereza umutungo no gukoresha inyandiko mpimbano, nk’uko byatanzwe n’Ubushinjacyaha.
Urukiko rw’Ibanze rwa Gasabo ni rwo rwa mbere rwari rwategetse ko afungwa by’agateganyo, rushingiye ku mpamvu zikomeye zituma akekwaho icyaha. Kalisa yahise ajuririra icyo cyemezo, asaba ko yakurikiranwa ari hanze ariko urukiko rwisumbuye rwa Gasabo rwatangaje ko nta shingiro ubujurire bwe bufite, rutegeka ko aguma muri gereza.
Byagaragajwe kandi ko dosiye ye yamaze gushyikirizwa urukiko ngo atangire kuburanishwa mu mizi, nyuma yo kwakira ibisabwa n’ubushinjacyaha.
