Amizero
Ahabanza Amakuru Politike Ubutabera

Urubanza rwa Bamporiki Edouard witabye Urukiko ku nshuro ya mbere rwasubitswe.

Honorable Bamporiki Edouard wahoze ari Umunyamabanga wa Leta muri Minisiteri y’Urubyiruko n’Umuco, yitabye Urukiko Rwisumbuye rwa Nyarugenge, atangira kuburana ku cyaha cyo gusaba no kwakira indonke ashinjwa.

Mu masaha y’igitondo nibwo Bamporiki yageze imbere y’Urukiko Rwisumbuye i Nyamirambo. Ntabwo bizwi neza isaha yagereye mu cyumba cy’iburanisha kuko abanyamakuru bari bahari nta n’umwe wigeze amubona yinjira.

Bamutegerereje hanze y’urukiko ariko baza gushiduka Inteko Iburanisha yinjiye, basanga nawe yicaye mu Rukiko. Mu gusohoka nabwo ntiyasohokeye ahasanzwe ahubwo yanyuze mu muryango ubusanzwe ukoreshwa n’abacamanza gusa.

Ubwo yageraga mu Rukiko, yari yambaye imyenda isanzwe, ipantalo n’ikote by’umukara n’ishati y’umweru. Nta mwunganizi yari afite nk’uko tubikesha Igihe.

Iburanisha ubwo ryari ritangiye, Bamporiki yahise abwira umucamanza ko afite imbogamizi z’uko nta mwunganizi afite. Yavuze ko uyu munsi mu rugaga rw’abavoka hari kuba amatora bityo ko umwunganizi we atabonetse kuko yayitabiriye.

Ntabwo byafashe umwanya munini kugira ngo Inteko Iburanisha yemere inzitizi zatanzwe na Bamporiki kuko iburanisha ryahise risubikwa, ryimurirwa ku wa 21 Nzeri 2022 saa mbili za mu gitondo.

Icyaha Bamporiki aregwa cyo gusaba no kwakira indonke, giteganywa kandi kigahanishwa ingingo ya kane y’itegeko ryerekeye kurwanya ruswa.

Iteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu, cyangwa wemera amasezerano yabyo kugira ngo akore cyangwa adakora ikiri mu nshingano ze, cyangwa yifashishije imirimo ye kugira ngo gikorwe cyangwa kidakorwa, aba akoze icyaha.

Iyo abihamijwe n’urukiko, ahanishwa igifungo kirenze imyaka 5 ariko kitarenze imyaka 7 n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Iyo byakozwe kugira ngo hakorwe ikinyuranyije n’amategeko, igihano kiba igifungo kirenze imyaka 7 ariko kitarenze imyaka 10, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse, yakiriye cyangwa yatanze.

Bamporiki yahagaritswe mu bagize Guverinoma muri Gicurasi ndetse ahita atangira gukorwaho iperereza, ategekwa kutarenga imbibi z’urugo rwe.

Ubwo yahagarikwaga mu kazi, Bamporiki yifashishije imbuga nkoranyambaga, yasabye imbabazi Umukuru w’Igihugu, anemera ko yakiriye indonke.

Ati: “Nyakubahwa Umukuru w’u Rwanda @PaulKagame, Narahemutse. Umutima wanze kumpa amahwemo. Bavandimwe, Nshuti zanjye, namwe abankurikira kuri uru rubuga, nakoze icyaha cyo kwakira indonke. Nkaba ntafite irindi jambo navuga usibye kubasaba mwese imbabazi. Ndatakambye.”

Umwe mu bahise basubiza kuri ubwo butumwa witwa Yumva Jean Paul, yagize ati: “Imbabazi z’Uwiteka n’abo yahaye ubutware zikubeho kandi ntukongere gukora ibisa bityo ukundi!”

Perezida Kagame yahise akomoza ku butumwa bwa Yumva, ko ibyo avuga byumvikana ariko Bamporiki amaze gusaba imbabazi inshuro nyinshi.

Ati: “Ibyo uvuga wowe bifite ishingiro, kutongera gukora ibisa nk’ibyo yakoze bibi. Bitari uguhora mu bibi ugahora usaba kubabarirwa! Ibya Bamporiki niko bimeze. Hari n’abandi bameze gutyo. Umuntu wese yakora icyaha ariko no kucyirinda birashoboka. Guhanwa na byo birafasha.”

Imbere y’abacamanza, Bamporiki yari yitonze yifashe neza, avuga ko adashobora kuburana adafite umwunganizi mu mategeko.

Related posts

Ikipe y’u Rwanda Amavubi itsinzwe n’iya Uganda igumana umwanya wa nyuma muri iri tsinda.

NDAGIJIMANA Flavien

Abashinjwa gusambanya ku gahato bagiye kujya baburanishirizwa aho icyaha cyabereye

NDAGIJIMANA Flavien

M23 yarashe Gen Chico Tshitambwe wari wigambye kuyirandurana n’abayitera inkunga.

NDAGIJIMANA Flavien

Leave a Comment