Amizero
Ahabanza Amakuru Imikino

Penaliti ya Sadio Mané ku munota wa nyuma yatumye Sénégal ibabaza abanyarwanda.

Igitego rukumbi cya Sadio Mané cyo ku munota wa nyuma cyatsinzwe kuri penaliti cyatumye Sénégal ibona amanota atatu itsinze u Rwanda mu mukino w’Umunsi wa kabiri wo mu Itsinda L ryo gushaka itike y’Igikombe cya Afurika kizabera muri Côte d’Ivoire mu 2023.

U Rwanda rwihagazeho iminota 90 yose y’umukino ariko ku wa nyuma w’inyongera rutsindwa igitego cyabonetse kuri penaliti yinjijwe neza na rutahizamu mpuzamahanga ufatwa nka nimero ya mbere muri Afurika, Sadio Mané.

Umutoza w’Amavubi, umunya-Espagne Carlos Alós Ferrer, yari yakoze impinduka mu bakinnyi yifashishije ku mukino wa mbere wahuje u Rwanda na Mozambique, wabereye mu Mujyi wa Johannesburg kuri FNB Stadium aho amakipe yanganyije igitego 1-1.

Uyu munsi yitabaje Bosco Ruboneka na Muhire Kevin mu mwanya wa Hakizimana Muhadjili na Nishimwe Blaise.

Uyu mukino watangiye Sénégal iyobowe n’ubusatirizi bwa Sadio Mané isatira Amavubi ariko ba myugariro b’u Rwanda bagahagarara neza.

Ku munota wa 35, Pape Matar Sarr yateye coup franc, ariko umupira ukomeye yagerageje kuboneza mu izamu ukurwamo na Kwizera Olivier wigaragaje nk’umuzamu w’umuhanga cyane.

Ubundi buryo bw’igitego bwabonetse ku munota wa 43 ubwo Sadio Mané yazamukanaga umupira agacenga ab’inyuma b’Amavubi ariko umupira yacomekeye Pape Sarr, awuteye yamurura inyoni uca hejuru y’izamu.

Ku munota wa 45, Amavubi yagerageje gusatira ariko umupira wazamukanywe neza na Ally Serumogo awuteye, uruhukira mu maboko y’umunyezamu Edouard Mendy.

Mu minota 45 ya mbere, abakinnyi b’Amavubi bashoboye kwihagararaho ndetse ntibinjizwa igitego ariko nabo ntibagira icyo binjiza.

Igice cya kabiri cyatangiye Amavubi agaragaza amashagaga yo gusatira. Ku munota wa 46, Serumogo yazamukanye umupira awuteye ashaka ba rutahizamu ufatwa na Rafael York agerageje gucenga akorerwaho ikosa ariko rihanwe ntiryatanga umusaruro.

Kugeza ku munota wa 51, abafana ba Sénégal izwi nka ‘Les Lions de la Teranga’ basaga n’abumiwe kuko ikipe yabo yari itarabona amahirwe afatika yo kwinjiza igitego ndetse umurindi wo gushyigikira ikipe wagendaga ugabanuka.

Ku munota wa 52, Amavubi yabonye amahirwe yashoboraga kubyara igitego ariko umupira mwiza Rafael York yacomekeye Kapiteni w’u Rwanda, Kagere Meddie, uyu rutahizamu awuteye uca hejuru y’izamu.

Sénégal yashakaga kotsa igitutu Amavubi yakoze impinduka ebyiri ku munota wa 57 aho Umutoza Aliou Cissé yinjije mu kibuga Saliou Ciss afata umwanya wa Fodé Ballo-Touré, mu gihe Pape Matar Sarr yasimbuwe na Keita Baldé Diao.

Izi mpinduka ntacyo zatanze ku ruhande rwa Sénégal kuko yakomeje gushaka igitego ariko irakibura kuko Kwizera Olivier yayibereye ibamba.

Ku munota wa 71, uyu mutoza yinjije mu kibuga abandi bakinnyi babiri barimo Pape Alassane Gueye na Famara Diédhiou, basimbuye Nampalys Mendy na Habib Diallo.

Aha ni ho Sénégal yatangiye gusatira ndetse Sadio Mané atangira kugaragara cyane noneho ashaka gutsinda.

Carlos Alós Ferrer utoza Amavubi na we ku munota wa 74 yakoze impinduka aho yakuyemo Muhire Kevin wari wabonye ikarita y’umuhondo yinjiza Nishimwe Blaise.

Abakinnyi b’Amavubi bakinaga bugarira bakomeje kwitwara neza ndetse byatumye Aliou Cissé yinjiza mu kibuga Pape Abou Cissé w’imyaka 26, asimbuye Youssouf Sabaly. Ibi byongereye imbaraga mu busatirizi bwayo.

Amavubi yashakaga kongera imbaraga mu busatirizi na yo yakoze impinduka ku ku munota wa 85, Yves Mugunga na Muhadjiri Hakizimana basimbura York Rafael na Meddie Kagere.

Mu minota y’inyongera ni bwo Ombolenga Fitina yinjiye mu kibuga asimbura Emmanuel Imanishimwe.

U Rwanda rwokejwe igitutu mu minota ya nyuma ndetse Sénégal yabonye penaliti ku munota wa 95 [uwa gatanu ari na wo wa nyuma mu y’inyongera] ku ikosa ryakozwe na Ange Mutsinzi.

Iyo penaliti yinjijwe neza na Sadio Mané nyuma y’uko Kwizera Olivier yakurikiye umupira ariko ananirwa kuwukuramo. Uyu rutahizamu yahise yuzuza ibitego 33 mu Ikipe y’Igihugu nk’uko tubikesha Igihe.

Muri uyu mukino u Rwanda rwabonye amakarita atatu y’umuhondo arimo iyahawe Kwizera Olivier, Muhire Kevin na Ange Mutsinzi. Mu gihe Sénégal yabonye ikarita imwe ya Nampalys Mendy.

U Rwanda rufite inota rimwe mu mikino ibiri rumaze gukina yo gushaka itike yo gukina Igikombe cya Afurika cya 2023.
Uyu mukino wagombaga kubera mu Rwanda kuko ari rwo rwari rwakiriye, gusa kuko nta Stade yujuje ibyangombwa iri mu Rwanda, biba ngombwa ko ruwakirira iw’abandi, uwo kwishyura akaba ari wo ushobora kuzabera mu Rwanda, biramutse byemejwe ko Stade ya Huye iri gusanwa yujuje ibisabwa.

Abakinnyi babanje mu kibuga ku mpande zombi:

Rwanda: Olivier Kwizera, Ally Serumogo, Ange Mutsinzi, Salomon Nirisarike, Manzi Thierry, Djihad Bizimana, Bosco Ruboneka, Rafael York, Emmanuel Imanishimwe, Kevin Muhire na Meddie Kagere.

Sénégal: Edouard Mendy, Youssouf Sabaly, Kalidou Koulibaly, Abdou Diallo, Habib Diallo, Idrissa Gueye, Nampalys Mendy, Pape Matar Sarr, Ismaila Sarr, Fode Toure na Sadio Mané.

Rutahizamu mpuzamahanga Sadio Mané wababaje abanyarwanda.

Related posts

Covid-19: Akarere ka Rubavu kashyizwe muri Guma mu Karere.

NDAGIJIMANA Flavien

Amateka ya Musenyeri Vincent Harolimana umaze imyaka 10 ayobora Diyoseze Gotolika ya Ruhengeri.

NDAGIJIMANA Flavien

Umunyezamu wa Rayon Sport n’Amavubi Kwizera Olivier yatawe muri yombi.

NDAGIJIMANA Flavien

Leave a Comment