Umuryango Imbuto Foundation watashye ku mugaragaro gahunda ya ImbutoHubs nk’ahantu hubakiwe gufasha imiryango mu iterambere n’imibereho myiza.
Ni igikorwa remezo cyatashywe mu rwego rwo kwizihiza imyaka 25 Umuryango Imbuto Foundation umaze uteza imbere imibereho y’Abanyarwanda mu nzego zitandukanye.
Iyi gahunda yatangirijwe i Nyamata mu karere ka Bugesera, Intara y’Iburasirazuba ahubatswe ikigo gifite serivisi zigamije guteza imbere imibereho myiza y’abaturage binyuze muri serivisi zinyuranye zirimo uburezi, ubuzima, imyuga, imikino no kwita ku bana bato.
Iki cyanya gifite ubushobozi bwo kwakira abanyeshuri 200 buri munsi, mu gihe isomero ryacyo rishobora gukoreshwa n’abagera kuri 960, gifite kandi ishami ritanga serivisi z’ubuzima, rikaba ryita ku baturage bagera kuri 750.
Ku bijyanye no guteza imbere ubumenyi n’imyuga, urubyiruko rugera ku 117 ruzajya ruhaherwa amahugurwa atandukanye arimo ubudozi, kogosha, ubwiza no gusuka imisatsi, mudasobwa n’indi myuga ibafasha kwihangira imirimo.
Imbuto Hubs ifite kandi Urugo Mbonezamikurire y’Abana Bato (ECD) ruzajya rwita ku bana bagera ku 1402, hagamijwe kubafasha gukura neza no kubategurira amashuri.
Iki gikorwa remezo kandi kirimo isomero ryagenewe abana, aho gukorera imyitozo ngororamubiri, ndetse n’ahagenewe abageze mu zabukuru, bahakinira imikino gakondo nk’amakarita n’igisoro.
