Ubuyobozi bw’Ingabo za Leta Zunze Ubumwe za Amerika zishinzwe ubufatanye n’Umugabane wa Afurika, AFRICOM buri gusuzuma uko zakorana n’iza Repubulika ya Demokarasi ya Congo, FARDC.
Itsinda ry’izi ngabo za AFRICOM riyobowe na Colonel Michael Gacheru ryakiriwe i Kinshasa n’Umugaba Mukuru w’ingabo za Repubulika ya Demokarasi ya Congo, Gen Jules Banza Mwilambwe, kuwa Kane tariki 22 Mutarama 2026 mu biganiro by’imbonankubone.
Col Gacheru na bagenzi be bo muri AFRICOM baganiriye n’abo muri FARDC (Igisirikare cya DR Congo) ku bufatanye muri gahunda yo kugarura amahoro n’umutekano iyobowe na Leta ya DR Congo.
Mu butumwa bwe yagize ati: “AFRICOM yishimiye ubushake FARDC ihorana n’ubufatanye bwayo mu gushaka uburyo twakomeza ubufatanye bwacu mu by’umutekano no guteza imbere amahoro arambye mu karere.”
Ambasade ya Leta Zunze Ubumwe za Amerika isanzwe ifasha ingabo za DR Congo, FARDC mu bijyanye n’imari n’amahugurwa ajyanye n’imyunga, Polisi y’iki gihugu igahabwa ibikoresho, ikanafashwa kubaka za sitasiyo.
DR Congo imaze igihe isaba Leta Zunze Ubumwe za Amerika kuyifasha kubaka inzego zayo z’umutekano zigakomera, iyisezeranya ko nibyemera, izaha abashoramari b’Abanyamerika ibirombe by’amabuye y’agaciro aboneka ku bwinshi muri iki gihugu.
Nyuma y’aho DR Congo n’u Rwanda bigiranye amasezerano y’amahoro n’ubufatanye mu iterambere ry’ubukungu mu Ukuboza 2025, ubufasha Leta Zunze Ubumwe za Amerika iha igisirikare cya DR Congo bushobora kwiyongera ndetse nk’uko DR Congo ibyifuza, Amerika ikaba yakemera ibyo kubaka FARDC n’ubwo hakiri impungenge zituruka kuri ruswa yamunze DR Congo.
