Mu irushanwa ryo gushaka itike mu mikino nyafurika(Fiba Women’s Afrobasket qualifiers) riri kubera i Kigali guhera kuri uyu wa mbere tariki ya 12 Nyakanga 2021, u Rwanda rwatsinze Kenya mu mukino warwo wa mbere.
Ni umukino wa kabiri mu mikino y’umunsi wa mbere, umukino u Rwanda rwatsinze Kenya amanota 77 ku manota 45.
Agace ka mbere k’uyu mukino karangiye ari amanota 23 y’u Rwanda kuri 18 ya Kenya, agace ka kabiri karangira ari amanota 10 y’u Rwanda kuri 12 ya Kenya, agace ka gatatu karangira ari amanota 25 y’u Rwanda kuri 02 ya Kenya mu gihe agace ka kane karangiye ari amanota 19 y’u Rwanda kuri 13 ya Kenya
Umukinnyi Tierra Henderson Monay w’u Rwanda niwe watsinze amanota menshi, 23, akurikirwa na Ineza Sifa Joyeuse watsinze amanota 15. Naho ku ruhande rwa Kenya, umukinnyi Mercy Wanyama niwe watsinze manota menshi, 13, mu gihe mugenzi we Felmas Odhiambo Karonga we yatsinze amanota 10
Umukino wa mbere wahuje ikipe ya Misiri (Egypt) ndetse n’ikipe y’igihugu ya Sudan y’amajyepfo. Uyu mukino warangiye ikipe y’igihugu ya Misiri (Egypt) itsinze Sudan y’amajyepfo amanota 95 kuri 65
Agace ka mbere karangiye ari amanota 36 ya Misiri kuri 19 ya Sudan y’Epfo, agace ka kabiri karangira ari amanota 20 Misiri kuri 23 ya Sudan y’Epfo, agace ka gatatu karangira ari amanota 14 ya Misiri kuri 30 ya Sudan y’Epfo mu gihe agace ka kane karangiye ari amanota 15 ya Misiri kuri 04 ya Sudan y’Epfo.
Muri uyu mukino Elgedawy Raneem wa Egypt niwe watsinze amanota menshi, 23 akurikirwa na Hagar Amer watsinze 19. Ku ruhande rwa Sudan y’amajyepfo, Nyamer Lual Diew yatsinze amanota 16 agakurikirwa na Nyanduoth Gach Lok watsinze amanota 9.
Kuri uyu wa 2 tariki ya 13 Nyakanga 2021 hateganijwe imikino 2 aho isaa cyenda (3PM), Kenya izacakirana na South Sudan mu gihe saa kumi n’ebyili (6PM)u Rwanda ruzisobanura na Misiri.
