Ikigo cy’Igihugu gishinzwe ibizamini n’ubugenzuzi bw’amashuri (NESA), cyatangaje ko abanyeshuri 277.452 ari bo biyandikishije gukora ibizamini bisoza amashuri abanza (Primary Six) byatangiye kuri uyu wa 07 Nyakanga 2026 mu gihugu hose.
Byatangijwe ku mugaragaro na Minisitiri w’Uburezi, Joseph Nsengimana, Umunyamabaga wa Leta muri iyi Minisiteri, Claudette Irere, Umuyobozi Mukuru wa NESA, Dr Bernard Bahati, ndetse n’abandi bayobozi bakuru muri MINEDUC n’ibigo biyishamikiyeho.
MINEDUC ivuga ko iki gikorwa ari ingenzi mu rwego rwo gukomeza guteza imbere ireme ry’uburezi no gupima ubumenyi abanyeshuri bafite nyuma yo kurangiza amashuri abanza.
Ibizamini bya Leta bisoza amashuri abanza (Primary Leaving Examinations) mu mwaka w’amashuri wa 2025/2026 byatangiye kuri uyu wa Kabiri tariki 07 bikazasoza ku wa Kane tariki 09 Nyakanga 2026.
Imibare yatangajwe na NESA igaragaza ko byitabiriwe n’abanyeshuri 277,452 hirya no hino mu gihugu. Abakobwa 154,351 n’abahungu 123,101. Biri gukorerwa kuri Santere (Centres) 1,182 mu gihugu hose. Abanyeshuri basaga 928 bafite ubumuga nabo bitabiriye bahawe ubufasha bwihariye.
