Ubaze umunsi ku munsi kuva ku itariki ya 08 Nzeri 1955 imyaka 70 irashize hakinwe umukino wa mbere wa UEFA Champions League, wahuje Real Madrid yo muri Espagne na Servette yo mu Busuwisi.
Uyu mukino wakiniwe i Geneva mu Busuwisi, irushanwa ryari rikitwa European Cup mbere yo guhindurirwa izina mu 1992, umukino warangiye Real Madrid iwutsinze ku bitego 2-0. Ibi bitego byatsinzwe na Miguel Muñoz, umunya-Espagne wahise anahinduka umukinnyi wa mbere watsinze igitego gifungura ibyatsinzwe muri iri rushanwa byose.
Igitego cya kabiri cyatsinzwe na José Héctor Rial. Iyi kipe yatozwaga na José Villalonga nawe akaba yari umunya-Espagne.Iyi ntsinzi yarabasunitse barinda bagera no ku mukino wa nyuma. Nyuma yo gutangira batsinda Servette, bakomereje kuri Partizan yo muri Serbian na AC Milan yo mu Butaliyani.
Ku mukino wa nyuma bahahuriye na Stade de Reims yo mu Bufaransa i Paris kuri Parc de Prince. Uyu mukino warangiye Real Madrid itsinze ibitego 4-3, kuri uyu mukino Alfredo Di Stéfano yatsinze ibitego 2, Héctor Rial, Marquitos nabo baratsinda, mu gihe ku ruhande rwa Stade de Reims ibitego byatsinzwe na Jean Templin, Michel Hidalgo ndetse René Bliard.
Nyuma y’uko Real Madrid itwaye iki gikombe, ibyakurikiyeho ni amateka yigwa mu mashuri no hanze yayo muri iri rushanwa. Mu myaka 70 iyi kipe imaze gutwara ibikombe 15, imaze gutsinda imikino 302 muri 503 yakinnye itsindamo ibitego 1104.
Uwari umuzamu wayo Iker Casillas ni we mukinnyi wa Real Madrid wayikiniye imikino myinshi igera 152, mu gihe Cristiano Roanldo ari we wayitsindiye ibitego byinshi, aho yayitsindiye 105. Ikipe ya Real Madrid ikurikiwe na AC Milan mu gutwara ibikombe, aho ifite ibikombe 7, Bayern Munich ikagira 6 inganya na Liverpool, FC Barcelona ikaba ifite ibikombe 5.
Cristiano Ronaldo uretse kuba yaratsindiye Real Madrid ibitego byinshi, ni nawe umaze gukina imikino myinshi mu irushanwa ryose ingana na 183, mu makipe 3 ari yo Manchester United, Real Madrid na Juventus ndetse akaba ari nawe umaze gutsinda ibitego byinshi bingana 143.
