Ikipe ya Rayon Sports imaze iminsi yitegura umwaka utaha w’imikino, uyu munsi ni bwo yasoje icyo yise Icyumweru cya Rayon Sports (Rayon Week). Iki Cyumweru cyasojwe n’umukino bakiniye mu karere ka Rubavu, urangira Etincelles ibatsinze igitego 1-0.
Uyu mukino wari uwa gatatu muri gahunda y’Icyumweru cyabo. Umukino wa mbere bawukiniye i Nyanza ku ivuko, maze batsinda ikipe ya Gasogi United ibitego 2-0. Ikipe ya Rayon Sports umukino wa kabiri yawukinnye na Gorilla i Ngoma iwutsinda igitego 1-0.
Uyu munsi nabwo, ku mukino ubanziriza Umunsi w’Igikundiro bari biteze ko bawutsinda ariko siko byagenze kuko Etincelles yabatsindiye igitego 1-0 kuri Stade Umuganda. Iki ni igitego cyabonetse ku mupira w’umuterekano (coup-franc) ku ikosa Ntarindwa Aimable yari akoreye Niyonkuru Sadjati.
Umupira watewe neza na Gedeon Gifula, maze umuzamu Yves Mugisha ntiyabasha gukuramo umupira wari uturutse inyuma y’urubuga rw’amahina. Hari ku munota wa 41, igice cya mbere kirangira gutyo ndetse no mu cya kabiri Rayon Sports ntiyabasha kugombora.
Ku munsi w’Igikundiro uzaba tariki ya 15 Kanama 2025, aba-rayons bamwe badatinya no gusanisha n’Umunsi w’Ijyanwa mu Ijuru rya Bikiramariya wizihizwa n’abakirisitu Gatolika kuri iyi tariki, bagomba gutana mu mitwe na Young Africans yo muri Tanzania.
Uyu mukino ukirangira bamwe mu bafana b’ikipe ya APR FC ak’ubukeba ntikiburiye, maze bazamukira ku ndirimbo Wasili usanzwe ukora mu kiganiro Rayon Time kinyura ku Isango Star, aherutse guhimbira Rayon yise ‘11 ni abazungu’,
Bati: “Etincelles yatsinze Rayon Sports abazungu 11 ba Wasili bahinduka aba-Métis.” Uretse Wasili kandi, iyi kipe muri gahunda yari imazemo iminsi, umuhanzi Zeo nawe yamurikiye abakunzi be n’aba-rayon iyo aherutse gushyira hanze yise ‘Rayon Sports’.
