Ikipe ya Red Arrows yo mu gihugu cya Zambia yegukanye igikombe mu irushanwa ‘CECAFA Kagame Cup 2024’ yaberaga muri Tanzania itsinze APR FC yo mu Rwanda Penaliti 10-9 nyuma kunganya igitego 1-1 mu minota 120 y’umukino.
Ni umukino wari uryoheye ijisho wabaye kuri iki Cyumweru tariki 21 Nyakanga 2024 mu birwa bya Zanzibar, aho iminota 90 ibanza yarangiye ari 1-1, bajya mu nyongera y’iminota 30, nayo biranga, hiyambazwa penaliti aho APR FC yinjije 9 ku 10 za Red Arrows, nyuma yuko Arsène yayihushije.
Iyi ibaye inshuro ya 5 Ikipe ya APR FC itsindiwe ku mukino wa nyuma mu irushanwa ‘CECAFA Kagame Cup’ hanze y’u Rwanda, ibikomeje gutuma bamwe mu bakeba bayishzugura bakayita ‘Star à domicile’ kuko nta gikombe na kimwe irabasha gukura hanze kandi ari yo kipe ya mbere ibitse ibukombe byinshi mu Rwanda.
