Umuyobozi w’ishami ry’igisirikare cy’u Budage rishinzwe iby’ikirere, Général Michael Traut, yatangaje ko iki gihugu giteganya gushora miliyari 41 z’Amadolari ya Amerika mu kugura no guteza imbere ibikoresho bya gisirikare bikoresha ikirere, birimo satelite z’ubutasi, imirasire yangiza (offensive lasers) n’ubundi buhanga bugezweho.
Iyi gahunda iri mu murongo mugari w’u Budage wo kongera ubushobozi bwa gisirikare, mu rwego rwo guhangana n’ihangana rikomeje kwiyongera ku rwego mpuzamahanga, cyane cyane rituruka ku bihugu nk’u Burusiya n’u Bushinwa.
Gen Traut yasobanuye ko u Budage bufite intego yo gutunga satelite zirenga 100 zikoresha ikoranabuhanga rihambaye mu guhererekanya amakuru mu ibanga no mu butasi. Muri izo gahunda kandi harimo guteza imbere imirasire ishobora kwangiza ibindi bikoresho biri mu kirere, gushyiraho utwuma two gutahura no gukusanya amakuru (sensors), no kubaka sisitemu zigamije guhagarika cyangwa gusenya satelite z’abanzi ndetse n’ibigo bizigenzura biri ku butaka.
Muri rusange, u Budage buteganya gukoresha miliyari 582 z’Amadolari ya Amerika mu nzego za gisirikare bitarenze umwaka wa 2029. Ibi bijyanye n’icyerekezo cya Chancelier w’u Budage, Friedrich Merz, ugamije guhindura igisirikare cy’igihugu cye imbaraga za mbere ku Mugabane w’u Burayi.
Nubwo iki gihugu kizwiho kugira ubukungu bukomeye kurusha ibindi byo mu Burayi, kiri guhangana n’imbogamizi zikomeye z’igihe kirekire mu bukungu no mu mibereho rusange y’abaturage. Umwaka ushize, Banki Nkuru y’u Budage yatanze umuburo ku cyuho gikomeye mu ngengo y’imari, ivuga ko ari ikibazo kidasanzwe kitigeze kibaho kuva mu ntangiriro z’imyaka ya 1990.
Ku rwego mpuzamahanga, iki cyerekezo cy’u Budage kije mu gihe hakiri impaka ku ikoreshwa ry’intwaro mu kirere. Mu 2008 no mu 2014, u Burusiya n’u Bushinwa byigeze gutanga igitekerezo cy’amasezerano mpuzamahanga abuza ishyirwaho n’ikoreshwa ry’intwaro mu kirere, ariko uwo mushinga ntiwigeze wemerwa, ahanini bitewe n’uko utashyigikiwe n’ibihugu byinshi bikomeye birimo na Leta Zunze Ubumwe za Amerika.
Izi gahunda nshya z’u Budage zigaragaza uko ikirere kigenda kiba urubuga rushya rw’ihangana rya gisirikare ku Isi, mu gihe ibihugu bikomeye bikomeje gushora imari mu ikoranabuhanga rigamije kurinda inyungu zabyo n’umutekano wabyo.
