Igisirikare cya Repubulika Iharanira Demokarasi ya Congo, FARDC cyigambye kwirukana umutwe wa M23 muri tumwe mu duce two muri Teritwari ya Masisi, nyuma y’ibitero kivuga ko cyatangiye kugaba ku barwanyi ba M23 bazengereje iki gisirikare cya Leta ya DR Congo.
Aya makuru mahimbano ya FARDC yanyuze mu butumwa umuvugizi wa Guverineri w’Intara ya Kivu y’Amajyaruguru, Lt Col Guillaume Ndjike Kaiko yanyujije muri video yashyizwe ku rubuga rwe rwa X , aho yavuze ko ingabo za Leta kuri ubu ari zo zigenzura uduce tw’imisozi twa Bweru, Bihambwe, Mema, Kaniro, Kavumu, Kasake, Kashovu na Bitonga.
Lt Col Guillaume Ndjike Kaiko yavuze ko FARDC yatwigaruriye nyuma yuko M23, ikwiye imishwaro igahunga nyuma y’ibitero bikomeye yagabweho. Ati: “FARDC yatangije ibitero mu gitondo cyo kuri uyu wa gatatu tariki 22 Gicurasi 2024 byo kurwanya M23, ibikorwa birakomeje kandi Ingabo zacu ubu ziragenzura uduce twa BWERU, BIHAMBWE, MEMA, KANIRO, KAVUMU, KASAKE, KASHOVU na BITONGA.
Umutwe wa M23 watangaje ko ibikomeje kuvugwa n’uruhande rwa Kinshasa ari ibinyoma byambaye ubusa kuko uduce twose bakitugenzura ndetse nta n’aho bateze kuva. Ni kenshi M23 yumvikana ishinja izi ngabo na Leta ya DR Congo gukwiza amakuru y’ibihuha atandukanye n’ukuri ko ku rugamba.
Mu mpera z’icyumweru gishize, Lt Col Willy Ngoma uvugira Igisirikare cya M23 yanyomoje Minisitiri w’Ingabo za DR Congo, nyuma yo gutangaza amakuru atari yo ko FARDC yirukanye M23 mu duce twa Kibirizi na Vitshumbi (Bicumbi) two muri Teritwari ya Rutshuru.
