Amizero
Amakuru COVID 19 Hanze Politike Ubuzima

Tanzania: Perezida Samia Suluhu yakingiwe Covid-19 asaba Abatanzania bose nabo kwikingiza.

Kuri uyu wa Gatatu tariki 28 Nyakanga 2021, Perezida Samia Suluhu wa Tanzania yakingiwe Covid-19, nyuma y’uko Igihugu cye cyemeye kwakira inkingo z’iki cyorezo no kuzitanga.

Samia Suluhu, wagiye ku butegetsi mu kwezi kwa gatatu, yagize ati: “Ntabwo turi ikirwa ni yo mpamvu ubu twatangiye gukingira”.

Uwo yasimbuye, Dr John Pombe Magufuli wapfuye mu kwezi kwa gatatu (Werurwe) uyu mwaka wa 2021, yakerensaga Coronavirus kandi yari yaranze inkingo zayo zakorewe mu mahanga, nyamara byavuzwe ko yaba ariyo yamwishe n’ubwo Leta ya Tanzania yo yatangaje ko yazize indwara y’umutima yari amaranye igihe kinini.

Madamu Samia Suluhu yahinduye ibintu afata undi murongo, asaba rubanda gukurikiza amabwiriza yo kwirinda iki cyorezo. Mu minsi ishize, Tanzania yakiriye doze miliyoni imwe y’inkingo za Johnson & Johnson zivuye mu mugambi wa Covax wo kugeza izi nkingo ku bihugu bikennye.

Ubu bwoko bw’inkingo za Johnson & Johnson abarutewe bahabwa doze imwe.

Mu muhango wo gutangiza gukingira, Perezida Samia Suluhu yasabye Abatanzania bose kwikingiza kandi ko hazaboneka izindi doze nyinshi z’inkingo.

Yavuze ko atazaganisha Igihugu mu nzira yakijyana mu kaga kuko ari umubyeyi, nyirakuru w’abana na Perezida.

Samia w’imyaka 61 yagize ati: “Kuva mvutse nafashe inkingo nyinshi kandi izo twahawe tukiri impinja zaraturinze iyo myaka yose, rero nta mpungenge mfite.”

Abanyamuziki baririmbye indirimbo ishishikariza abantu kwikingiza no kwirinda Covid-19, nubwo muri uwo muhango bahererekanyaga indangururamajwi ebyiri (microphones) batazihanaguje umuti wica imyanda n’udukoko dutera indwara nk’uko tubikesha BBC.

Ku wa kabiri, umukuru w’ikigo cyo kwirinda no kurwanya ibyorezo cy’ubumwe bwa Africa (Africa CDC) yashimye Samia Suluhu gushyiraho ingamba zo kwirinda ikwirakwira rya Covid-19.

Related posts

Abasirikare basaga 1700 bari bagotewe mu ruganda Azovstal bamaze kuyamanika imbere y’Abarusiya [AMAFOTO].

NDAGIJIMANA Flavien

Huye: Bagiye gufata umurambo w’umugabo kwa muganga ngo bawushyingure batungurwa no kumusanga yinywera agakoma.

NDAGIJIMANA Flavien

Abarwanyi ba M23 baravugwa mu marembo ya Rutshuru

NDAGIJIMANA Flavien

Leave a Comment