Rubavu: Abarerera ku ishuri rya EPGI-ULK bavuga ko umurage nyawo muri iki gihe ari uburezi bufite ireme. [AMAFOTO]

Ababyeyi n’abarezi barerera ku ishuri rya EPGI-ULK riherereye mu Karere ka Rubavu bemeza ko muri iki gihe ushaka kuraga umwana we umurage nyawo, amuraga kumushakira ishuri rigezweho, ritanga uburezi bufite ireme. Bemeza ko kuba baregerejwe iri shuri, ari amahirwe adasanzwe bahawe na Rurema, kuko ngo abana babo bahise babyungukiramo bakabona uwo murage badafashe za rutemikirere ngo bajye i mahanga.

Aba babyeyi babishingira ku kuba abana babo bakomeje kugaragaza ubumenyi n’uburere buri ku rwego rwo hejuru, ibintu bumvaga ko bitapfa kuborohera bitewe n’uburezi bifuzaga. Bamwe mu baganiriye n’umunyamakuru wa www.amizero.rw bamugaragarije ko ibyifuzo byabo byasubijwe.

Umwe muri aba babyeyi bafite abana kuri EPGI-ULK avugako yumvaga ashaka kujyana umwana we mu mahanga kuko yashakaga ko yiga igifaransa neza. Ati: “nkubwije ukuri numvaga umwana wanjye agomba kwiga mu mahanga. Gusa maze kumenya urwego rw’imyigishirize ya EPGI-ULK ndetse n’ukuntu bita ku bana, nahise mfata umwanzuro muzana kuri iri shuri kandi urwego ariho ni urwego rushimishije cyane yaba mu gifaransa, icyongereza ndetse n’andi masomo, hakiyongeraho ikinyabupfura, isuku n’umurava mu buzima bwe bwa buri munsi. Ibi byose abitorezwa kuri iki kigo”.

Mugenzi we nawe ahamya ko we atabona amagambo abivugamo, ko gusa abona iri shuri ari umurage Imana yabahaye, nabo bakaba barahisemo kuraga abana babo kwiga muri iri shuri aho bazakura uburezi n’uburere. Ati: “Twe tukibyiruka, ba sogokuru na ba sogokuruza baturaze amashyo, abandi babaraga amasambu kuko ari byo byari bigezweho. Uyu munsi kubera iterambere nta nka tukigira, amasambu nayo twayamaze tuyubakamo inzu zo guturamo n’iz’ubucuruzi. Twahisemo rero kuraga abana bacu umurage mwiza uzabagirira akamaro mu buzima bwabo bwose, duhitamo EPGI-ULK bitewe n’uburezi buri ku rwego mpuzamahanga itanga”.

Umwe mu barezi barerera kuri iri shuri avugako bagerageza gukora ibishoboka, bakitanga batizigamye nk’intore bagamije kugera ku musaruro uhesha ishema Igihugu. Ati: “Tugendera ku ndangagaciro nyarwanda, tuzirikana kandi ubutwari bw’abatubanjirije, bigatuma natwe dukoresha imbaraga n’umutimanama duharanirako ibyo dukora byarenga imipaka bikaba byakifuzwa n’abo hanze. Mu by’ukuri kugera ku byiza biravuna kuko bisaba kubitegura, ugakora cyane kandi ubishyizeho umutima, ubundi umusaruro ukaboneka. Muri macye rero mu bufatanye byose birashoboka, icy’ibanze ni uko abanyeshuri bahabwa imyitozo ihagije mu gihe gikwiye, bigatuma bashobora kwigirira icyizere mu byo bakora dore ko  banabigaragariza mu bizamini bya Leta yaba ibyo ku rwego rw’Igihugu n’ibikorerwa ku rwego rw’ Akarere aho abanyeshhuri batsinda ku rwego rwo hejuru. Abacu baba baramenyereye kubazwa kuko buri gitondo bakora amasuzuma(morning evaluations)”.

Umuyobozi wa EPGI-ULK ni bwana Bigirimana Dusabe Theogene. We avuga ko ibi byiza byose babikesha umurongo uhamye washyizweho n’uwashinze iri shuri Prof.Dr Rwigamba Balinda uhora yifuza ko umwana w’u Rwanda ndetse n’undi wese ugana u Rwanda yahabwa uburezi buri ku rwego mpuzamahanga, akanafashwa kwigishwa indangagaciro z’umuco nyarwanda na kirazira zimwubakamo ubumuntu bumufasha guhora aharanira gukora icyiza. Uyu muyobozi yavuzeko ibanga bakoresha ari ugukorera hamwe nk’ikipe (Teamwork spirit) yaba abayobozi, abarezi, ababyeyi n’abana bagamije kugera ku ntsinzi idasubira inyuma.

EPGI-ULK ni kimwe mu ruhererekane rw’ibigo bya ULK Ltd birimo: ULK Kigali(main Campus), ULK Gisenyi, GLORY Academy ifite amashuri yisumbuye, imyuga, abanza n’ay’inshuke. EPGI-ULK yatangiye mu kwezi kwa cumi(Ukwakira) mu 1994, ikaba ikorera mu Karere ka Rubavu, Umurenge wa Gisenyi, Akagari ka Kivumu. Ni ishuri ryigisha rikurikije gahunda ya Leta (National Programm) mu rurimi rw’icyongereza n’igifaransa nk’indimi mpuzamahanga zikoreshwa henshi ku Isi. Abana biga kuri iki kigo baturuka hirya no hino mu Gihugu, hakiyongeraho n’abaturuka mu mahanga yaba aya hafi n’aya kure.

Ubwo ku wa mbere tariki 19 Mata 2021 abanyeshuri batangiraga amasomo y’igihembwe cya kabiri ku biga ay’inshuke n’abanza n’icya gatatu ku bandi bose (Upper Primary, Lower Secondary, Upper Secondary), iki kigo nacyo kikaba cyaratangiye kwigisha, hubahirizwa ingamba zo kwirinda icyorezo cya Covid-19 gikomeje kuyogoza Isi.

REBA ANDI MAFOTO: