Minisitiri w’imikino n’imyidagaduro wa Repubulika ya Demokarasi ya Congo yatangaje ko abona nta wundi wasimbura Perezida Félix Tshisekedi Tshilombo kandi ko ngo berekeje kuri manda ye ya gatatu.
Abwira abarwanashyaka b’ishyaka UDPS riri ku butegetsi, mu gace ka Kasangulu mu ntara ya Kongo-Central, Minisitiri Didier Budimbu yavuze ko bagiye gutangiza inkubiri yo gusaba ihindurwa ry’itegekonshinga kugira ngo bitume Tshisekedi yiyamamariza manda ya gatatu.
Hashize igihe igitekerezo cya manda ya gatatu, ubusanzwe itemewe n’itegekonshinga rya RD Congo giteza impaka muri rubanda no mu banyapolitike, izo mpaka zongeye kwiyongera mu mpera z’icyumweru gishize.
Minisitiri Budimbu, mu kumvikanisha ko Tshisekedi agomba kugumaho, yagize ati: “Niba Perezida Félix Tshisekedi avuye ku butegetsi, ni nde yabusigira? Kandi se uwo yabuha yabukoresha iki?”
Budimbu yasubiyemo “ibikorwa by’iterambere” n’imibereho myiza avuga ko Tshisekedi yagejeje ku gihugu, mu gushimangira ko akwiye kugumana ubutegetsi, ashimangirako bagiye gukora ubukangurambaga yise “Tout Droit Ti na Trois” cyangwa se “Twerekeje ku ya [manda] gatatu”.
Bamwe mu batavuga rumwe n’ubutegetsi bamaganye igitekerezo cy’abo mu ishyaka rya Tshisekedi cyo gushaka guhindura itegekonshinga kugira ngo yiyamamarize manda ya gatatu.
Mu mpera z’icyumweru gishize, Augustin Kabuya, umunyamabanga mukuru w’ishyaka UDPS, yavuze ko bagomba “gukora ku itegekonshinga”.
Kabuya yumvikanye agira ati: “Mobutu yarihinduye inshuro 17, Mzee Laurent-Désiré Kabila yarihinduye inshuro eshatu, na Joseph Kabila yararihinduye… none ni iyihe ngingo yabuza UDPS gukora ku itegekonshinga?”
Mu cyumweru gishize, Bahati Lukwebo, umukuru wungirije wa Sena ya RD Congo, yatangaje ko yamaganye imihate yose yo kugerageza guhindura itegekonshinga ry’iki gihugu.
Mu mpera z’icyumweru gishize, Sena ya DR Congo yasohoye itangazo rivuga ko yitandukanyije n’ibyatangajwe na Lukwebo, ko “yabivuze ku giti cye”.
Tshisekedi uri ku butegetsi kuva mu 2019, ubwe ntaravuga niba yifuza manda ya gatatu, gusa mu 2024 yavuze ko itegekonshinga rikwiye kuvugururwa kuko hari aho rifite “intege nkeya”.
Ubutegetsi bwe buhanganye n’ibibazo bitandukanye birimo intambara mu burasirazuba bw’igihugu aho FARDC ihanganye n’umutwe wa M23.
Amatora ataha muri DR Congo ateganyijwe mu kwezi kwa 12 (Ukuboza) 2028, ubwo manda ya kabiri ya Tshisekedi y’imyaka itanu yemererwa n’itegekonshinga izaba irangiye. Abakurikiranira hafi iby’iki gihugu bakaba bemezako azitwaza intambara maze akaguma ku butegetsi.
