Perezida w’u Burundi, Evariste Ndayishimiye, yageze i Kinshasa muri Repubulika ya Demokarasi ya Congo ku gicamunsi cyo kuri uyu wa Mbere, mu ruzinduko rw’iminsi ibiri aherekejwe n’umugore we Angeline Ndayubaha Ndayishimiye, aho yakiriwe na mugenzi we wa DR Congo Felix Antoine Tshisekedi Tshilombo na madame Denyse Nyakelu Tshisekedi.
Perezida Ndayishimiye agiriye uru ruzinduko i Kinshasa mu gihe mu burasirazuba bwa DRCongo hakomeje imirwano ikomeye, rukaba rero rwitezwemo ibiganiro ku ngingo zirimo umuti kuri iyi ntambara iri kubera mu Ntara ya Kivu y’Amajyepfo na Kivu y’Amajyaruguru.
Mu birori byatambutse ako kanya (Live) kuri Television y’Igihugu, RTNC, abanyamakuru bemeje ko Félix Tshisekedi yakiriye ‘umushyitsi w’imena ndetse umuvandimwe’ ku kibuga mpuzamahanga cy’indege cya N’Djili i Kinshasa ku gicamunsi cyo kuri uyu wa Mbere tariki 22 Kamena 2026 bakaba bakomereje mu muhezo ahabereye ikiganiro cyihariye no kuganira n’itangazamakuru.
Byatangajwe ko “Ikiganiro hagati yabo kirarebana n’ibibazo dusangiye birimo icy’umutekano mucye twashowemo n’umuturanyi wacu mu burasirazuba bwa DR Congo n’ingamba zo kurwanya indwara y’icyorezo ya Ebola.”
Tubibutse ko ingabo z’u Burundi n’iza DR Congo zifatanya mu ntambara yo kurwanya umutwe wa AFC/M23 na MRDP-Twirwaneho, hashingiwe ku masezerano ibihugu byombi byasinyanye mu mwaka wa 2022, avugururwa muri Kanama 2023.
Muri iki gihe, izi ngabo zakajije ibitero muri Minembwe no mu nkengero zaho, zigamije gukuramo abarwanyi ba MRDP-Twirwaneho bamaze imyaka hafi 10 barinda umutekano w’Abanyamulenge ariko bazibereye ibamba.
Tariki ya 17 Kamena uyu mwaka, ubwo Tshisekedi yari mu mujyi wa Houston muri Leta Zunze Ubumwe za Amerika, yabwiye Abanye-Congo babayo ko ingabo zabo ziri kwitwara neza ku rugamba rwo muri Minembwe, ateguza ko vuba zizisubiza Umujyi wa Goma na Bukavu.
Ubutumwa bwa Tshisekedi bwakurikiwe n’itangazo ry’ingabo za DR Congo ryavugaga ko zafashe Minembwe ariko ubuyobozi bwa MRDP-Twirwaneho mu rwego rwa politiki n’urwa gisirikare rwabiteye utwatsi.
Perezida wa MDRP-Twirwaneho, Dr. Freddy Kaniki, tariki ya 18 Kamena 2026 yabwiye itangazamakuru ko intego y’ingabo za Leta ya Kinshasa yo gufata Minembwe idashoboka. Agira ati: “Ntekereza ko bifuza ko baba babikoze. Ntibabikoze kandi ntibazabikora. Ibyo ubyandike ku rutare, ntibizahinduka.”
MDRP Twirwaneho yatangaje ko mu cyumweru gishize Minembwe yagabweho ibitero bikomeye byagizwemo uruhare n’ingabo za DR Congo, FARDC, iz’u Burundi, umutwe w’iterabwoba wa FDLR na Wazalendo, kandi ko abasivili ari bo bagambiriwe.
Ku wa 21 Kamena, Col Fidèle Rugabo uvugira MRDP-Twirwaneho yatangaje ko abarwanyi babo bakomeje gusunikira ihurireo ry’ingabo zirwana ku butegetsi bwa Kinshasa kure, agaragaza ko zizakumbura Minembwe.
Abinyujije ku rukuta rwe rwa X, Col Rugabo yagize ati: “Akebo ni geramo. Gakenke baraducokoje, reka tubavugutire umuti ubakwiye FARDC, FDNB, Waza, FDLR n’abandi. Muzakumbura Minembwe. Turaje ni mu kanya.”
Ubundi butumwa Col Rugabo yatangaje ku mugoroba w’uwo munsi yifashishije X, buvuga ko MRDP-Twirwaneho yabohoye uduce turimo Gakenke ahazwi nko ‘Kwa Rutaganda’ n’umusozi wa Sinai, ingabo za Leta ya RDC zikwira imishwaro.
