Perezida wa Guinée, Mamadi Doumbouya, yageze mu Rwanda, aho yitabiriye Inama ihuza abayobozi b’ibigo, abashoramari n’abanyapolitiki bo hirya no hino muri Afurika no hanze yayo, izwi nka ‘Africa CEO Forum’.
Perezida Doumbouya yageze mu Rwanda mu ijoro ryo kuri uyu wa Kabiri rishyira ku wa Gatatu aho yitabiriye inama y’iminsi ibiri, itegerejwemo abarenga 2800, izabera mu mujyi wa Kigali, kuwa Kane no kuwa Gatanu ku matariki ya 14 na 15 Gicurasi 2026.
Akigera ku kibuga cy’indege, yakiriwe na Minisitiri w’Ingabo Juvenal Marizamunda, wari uherekejwe n’abayobozi barimo Umugaba Mukuru w’Ingabo z’u Rwanda, Gen Mubarakh Muganga, Umuyobozi Mukuru wa Polisi y’u Rwanda, CG Felix Namuhoranye, Meya w’Umujyi wa Kigali, Dusengiyumva Samuel n’abandi.
Africa CEO Forum ni inama izenguruka mu bihugu bya Afurika. U Rwanda rugiye kuyakira ku nshuro ya gatatu kuko ku nshuro ya mbere rwayakiriye mu 2019, rwongera kuyakira mu 2024.
Itegurwa n’ikigo Jeune Afrique Media Group gifite ikinyamakuru Jeune Afrique, gifatanyije na Sosiyete y’Abasuwisi, Rainbow Unlimited izobereye mu gutegura inama zikomeye zijyanye n’ubukungu.
Ni inama mpuzamahanga ihuriza hamwe abavuga rikumvikana mu rwego rw’abikorera muri Afurika barimo abacuruzi bakomeye, abayobozi b’ibigo, abashoramari n’abandi. Ikigo cy’Ubucuruzi na cyo cyemererwa kwitabira kigomba kuba nibura ku mwaka cyinjiza miliyoni 20 z’amayero.
