Ihuriro AFC/M23 rirwanya ubutegetsi bwa Repubulika ya Demokarasi ya Congo ryahigiye kutarekura santere ya Rubaya iherereye muri Teritwari ya Masisi mu Ntara ya Kivu y’Amajyaruguru.
AFC/M23 yatanze ubu butumwa kuri uyu wa 26 Gicurasi 2026 mu gihe kuva mu cyumweru gishize, ibice biri hafi ya Rubaya biri kuberamo imirwano ikomeye iyihanganishije n’ingabo za RDC zifatanyije n’imitwe igize ihuriro Wazalendo.
Intandaro y’iyi mirwano yabaye ibitero ingabo za RDC na Wazalendo byagabye ku birindiro bya AFC/M23 mu duce turimo Kinigi, Kawere na Chugi, mu bilometero bigera kuri 30 ugana Rubaya.
Mu mpera z’icyumweru, ingabo za Leta ya RDC zatangaje ko zafashe uduce twinshi two muri segiteri ya Katoyi, bigaragaza ko bifite icyizere ko vuba bizafata na Rubaya.
Kuva mu gitondo cyo kuri uyu wa 26 Gicurasi, AFC/M23 yigaranzuye ingabo za Leta ya RDC, yisubiza uduce twinshi two muri Masisi turimo, Bukinanyana, Gasenyi, Runigi, Karunga, Bushiha, Nkokwe, Nyakigano, Mushebere na Kavuta.
Umuyobozi wa Teritwari ya Masisi washyizweho na AFC/M23, Emmanuel Ndizeye Rutebuka, uyu munsi yasuye abaturage ba Rubaya, abamenyesha ko iri huriro ryafashe ingamba zikomeye zo kurinda iyi santere, bityo ko ingabo za RDC na Wazalendo bitazayifata.
Ndizeye yagize ati “Ubaye utizera ingabo zanyu n’ubuyobozi bwanyu, ntiwafata amafaranga yawe ngo wubake inzu. Abayobozi bacu bantumye ngo mbabwire ko bazarinda Rubaya, bazarinda aho mutuye,…ntimugire ubwoba rwose. Nindangiza inama, abari kubaka inzu mubikomeze. Dushaka iterambere.”
Uyu muyobozi yasabye abatuye muri Rubaya gukorana n’inzego z’umutekano za AFC/M23 n’ubuyobozi bwo mu nzego z’ibanze kugira ngo babungabunge umutekano waho.
Rubaya ni igice gikungahaye ku mabuye y’agaciro ya Coltan, kuko 15% by’iyoherezwa ku isoko mpuzamahanga ni ho ituruka. Igenzurwa na AFC/M23 kuva muri Gicurasi 2024 ubwo yakuragamo ingabo za RDC, iz’u Burundi na Wazalendo.
