Abacuruzi 150 biganjemo abazunguzayi bahoze bacururiza ku muhanda mu Karere ka Karongi bahawe ibibanza mu isoko rigezweho ryubatswe mu murenge wa Rubengera.
Mu ntangiriro z’Ukuboza 2025 nibwo ubuyobozi bw’Akarere ka Karongi bwakoranye inama n’abazunguzayi bubashishikariza gufata ibibanza mu isoko ryubatswe na bamwe mu bikorera bo muri uyu murenge.
Ubuyobozi bw’Akarere bwanabakoreye ubuvugizi kuri ba nyir’iri soko bemera guha aba bacuruzi bato ukwezi k’ubuntu ko gukorera muri iri soko batishyuye mu gihe abakiliya batarahamenyera.
Umuyobozi w’Akarere ka Karongi wungirije ushinzwe iterambere ry’ubukungu, Ntakirutimana Julienne avuga ko impamvu abakiliya bakiri bake muri iri soko ari uko aribwo rigitangira.
Isoko rya Rubengera (RUCID) ryubatswe n’abikorera barenga 30 bishyize hamwe rikaba rizuzura neza ritwaye arenga miliyari 1,2 Frw.
Rifite ubushobozi bwo kwakira abacuruzi barenga 225 barimo 75 bakorera mu miryango y’ubucuruzi n’abandi 153 bakorera mu isoko rusange.
