Mu mukino wanyuma wabaye kuri uyu wa gatandatu tariki ya 17 Nyakanga 2021, muri Kigali Arena, Kenya itsinze Misiri yegukana igikombe cy’irushanwa ry’akarere ka 5 ibona itike yo kugina imikino nyafurika ya Basketball (Fiba Women’s Afrobasket)
Mu mukino wanyuma w’irushanwa ryo gushaka itike y’igikombe cy’imikino nyafurika mu rwego rw’abari n’abategarugori, Kenya itsinze Misiri ku manota 99 kuri 83.
Ikipe y’igihugu cya Kenya yagaragaye mu ishusho idasanzwe mu mikino yayo 2 iheruka, yegukanye igikombe itsinze ikipe ya Misiri itari yagatsinzwe umukino n’umwe kuva iri rushanwa ryatangira.
Agace ka mbere karangiye ari amanota 24 ya Misiri kuri 29 ya Kenya, agace ka kabiri habonekamo amanota 18 ya Misiri kuri 21 ya Kenya, agace ka gatatu anganya amanota 27 kuri 27, mu gihe agace ka kane habonetsemo amanota 14 ya Kenya kuri 22 ya Kenya.
Muri uyu mukino, Victory Reynolds wa Kenya niwe watsinze amanota menshi akurikirwa na mugenzi we Felmas Adhiambo Karonga watsinze amanota 24. Ku ruhande rwa Misiri, Hagar Amer yatsinze amanota 18 mu gihe mugenzi we Raneem Elgedawy yatsinze 17.
U Rwanda rwegukanye umwanya wa gatatu rutsinze Sudan y’amajyepfo amanota 83 kuru 56.
Muri uyu mukino agace ka mbere karangiye ari amanota 31 y’u Rwanda kuri 14 ya Sudan y’Epfo, agace ka kabiri kabonekamo amanota 23 ya Misiri kuri 09 ya Sudan y’Epfo, agace ka gatatu kabonekamo amanota 8 y’u Rwanda kuri 16 ya Sudan y’Epfo mu gihe agace ka kane kabonetsemo amanota 20 ya Misiri kuri 17 ya Sudan y’Epfo.
Muri uyu mukino, Odile Tetero w’u Rwanda niwe watsinze amanota menshi, aho yatsinze amanota 21.
Imikino ya nyuma yo guhatanira igikombe cya Africa izabera muri Cameroon muri Nzeri, 2021 uhereye ku itariki ya 17 kugera 26, ubwo iki gikombe kizaba gikinirwa ku nshuro ya 25. Ikipe ya Nigeria niyo iheruka kwegukana iki gikombe itsinze Senegal.
