LiverpooI yatsinze Arsenal igitego 1-0 mu mukino w’umunsi wa gatatu wa Shampiyona y’Abongereza, ikomerezanya agahigo ko kumara imyaka 13 badatsindirwa ku kibuga cyabo Anifield.
Amakipe yombi yagiye gukina uyu mukino yaratsinze imikino ibiri yayo ibanza afite amanota 6/6, mu mukino warimo kwigana cyane ku mpande zombi nta kipe yifuza gutsindwa igitego. Igitego cya Liverpool cyabonetse giturutse ku mupira w’umuterekano watewe na Dominik Szoboszlai umuzamu David Raya ntiyabasha kuwugarura.
Uyu mupira waturutse ku ikosa ryari rikozwe na Martin Zubimendi arikorera Curtis Jones. Iki gitego cyo ku munota wa 83 cyatumye ikipe ya Liverpool ibona amanota atatu imbere y’abana bayo. Uyu mukino watumye Arsenal inanirwa gukuraho igisuzuguriro cyo kuva mu 2012 batabonera amanota 3 ku kibuga cya Liverpool Anifield, igikomeye bakora ari ukunganya.
Arsenal ubwo iheruka gutsindira ku kibuga cya Liverpool yari yayitsinze ibitego 2-0, mu mukino wo ku wa 31 Kanama 2012 muri shampiyona. Ibitego bya Arsenal byatsinzwe na Lukas Podolski ndetse Santi Cazorla. Uyu mukino batakaje uyu munsi wakuye agahigo k’imikino 15 yikurikiranya ikipe ya Arsenal yari imaze idatsindwa n’ikipe iyo ari yo yose yakiniye hanze muri shampiyona.
Livepool nyuma yo gutsinda uyu mukino yahise ifata umwanya wa mbere n’amanota 9/9 aho ikurikiwe na Chelsea ifite amanota 7, Arsenal nyuma yo gutsindwa yagumanye amanota 6 ku mwanya wa gatatu. Liverpool izagaruka mu kibuga ikina na Burnley tariki ya 13 Nzeri 2025, naho Arsenal tariki 14 icakirane na Nottingham Forest.
