Perezida wa Repubulika y’u Rwanda Paul Kagame, akaba n’Umugaba w’ikirenga w’ingabo z’u Rwanda, RDF yakoze impinduka zikomeye mu buyobozi bwa RDF maze Juvénal Marizamunda agirwa Minisitiri w’ingabo z’u Rwanda mushya, mu gihe Liyetona Jenerali Mubarakh Muganga yagizwe umugaba mukuru w’ingabo z’u Rwanda (RDF), ibi bikaba byabaye no mu rwego rw’ubutasi.
Marizamunda, usimbuye kuri uwo mwanya Jenerali Majoro Albert Murasira, yari asanzwe ari umukuru w’urwego rw’igihugu rushinzwe imfungwa n’amagereza.
Lt Gen Muganga, usimbuye Jenerali Jean Bosco Kazura, we yari asanzwe ari umugaba mukuru w’ingabo zirwanira ku butaka.
Jenerali Majoro Vincent Nyakarundi wari usanzwe ari umukuru w’ubutasi bwa gisirikare, ni we wasimbuye Lt Gen Muganga ku mwanya w’umugaba mukuru w’ingabo zirwanira ku butaka.
Muri izi mpinduka kandi, Col Francis Regis Gatarayiha yagizwe umukuru w’agateganyo w’ubutasi bwa gisirikare, mu gihe Jean Bosco Ntibitura yabaye umuyobozi mukuru (Director General) mu rwego rw’ubutasi bw’imbere mu gihugu (NISS).
Burigadiye Jenerali Evariste Murenzi yagizwe umukuru w’urwego rw’igihugu rw’igorora, asimbura Marizamunda.
Jenerali Majoro Alex Kagame yabaye umukuru w’ibikorwa bya gisirikare muri Mozambique, mu gihe Koloneli Théodomir Bahizi ari we ukuriye ibijyanye n’urugamba rwo muri Mozambique.
Kuva mu kwezi kwa Nyakanga (7) mu 2021, u Rwanda rwohereje abasirikare n’abapolisi muri Mozambique ku busabe bwa leta y’icyo gihugu kurwanya intagondwa ziyitirira idini ya Islam zari zarigaruriye ibice byinshi byo mu ntara ya Cabo Delgado mu majyaruguru.
Umugaba mukuru w’ingabo z’u Rwanda yaherukaga guhindurwa mu kwezi kw’Ugushyingo mu 2019, ubwo Jenerali Kazura, icyo gihe wari Jenerali Majoro, yazamurwaga mu ntera mu mapeti agasimbura Jenerali Patrick Nyamvumba, wari uri kuri uwo mwanya kuva mu 2013.
Jenerali Majoro Murasira we yari Minisitiri w’ingabo kuva mu kwezi kwa cumi mu 2018, umwanya yagezeho asimbuye Jenerali James Kabarebe wari uwumazeho imyaka umunani.
