Abarwanyi b’Umutwe wa ARC/M23 bageze muri birometero bibiri gusa winjira rwagati muri Centre ya Rutshuru ari nayo ibarizwamo ibiro bikuru bya Teritwari.
Ibi bibaye nyuma y’aho ingabo za Leta ya Congo, FARDC zamburiwe uduce twa Bikenke, Ntamugenga na Kabindi, abasirikare benshi ba FARDC bagahita batangira guhunga, bamwe berekeza ahitwa Kanyabayonga,g abandi bakirunda ahitwa Burayi.
Umwe mu bakozi ba Teritwari ya Rutshuru utashatse ko amazina ye atangazwa yabwiye Rwandatribune dukesha iyi nkuru ko abaturage batangiye guhunga, abenshi bakaba berekeza ahitwa i Tongo na Kiwanja hasanzwe hari ingabo za MONUSCO.
Uyu muyobozi yagize ati: “Nta cyizere ko abasirikare ba Leta n’imitwe ya Mai Mai Nyatura bashobora kurinda Rutshuru kuko nabo nta cyizere bifitiye. Ingabo bahanganye nazo zibarusha ibikoresho ndetse n’ubuhanga gusa muri iki gihe, irembo ry’umujyi ririnzwe na FDLR wenda ahari yo irapfa guhanyanyaza”.
Uyu muyobozi kandi yemeje ko mu rugamba rw’ejo hari abarwanyi ba FDLR na Mai Mai Nyatura bafatiwe mu mirwano yabereye muri Gurupoma ya Bikenke ndetse abandi bakahasiga ubuzima.
Intambara ya M23 na Leta ya Congo ikomeje kuvuza ubuhuha mu gihe Leta ya Congo ikomeje gushinja u Rwanda kuba inyuma ya M23, ibintu u Rwanda rwakomeje kwamaganira kure kuko ngo ibibazo bya Congo bireba abanyekongo ubwabo aho kuba undi wese wo hanze.
