Imibare mishya yerekana ko ingo hafi 4,500 mu Rwanda zasabye gutandukana mu mwaka ushize mu gihe imibare y’abahawe gatanya yikubye kabiri mu 2025 ugereranyije na 2024.
Raporo nshya y’ikigo cy’Igihugu cy’Ibarurishamibare yerekana ko ingo zigera ku 2,629 zahawe gatanya umwaka ushize mu gihe 1,068 ari zo zari zayihawe mu 2025 inyongera igera kuri 58%.
Gutandukana kw’ingo ni kimwe mu bibazo bihangayikishije umuryango nyarwanda ndetse na Leta by’umwihariko.
Mu kwezi kwa Kabiri (Gashyantare) uyu mwaka, mu gikorwa cy’amasengesho yo gusengera Igihugu, Perezida wa Repubulika Paul Kagame yagarutse kuri iki kibazo.
Yagize ati: “Abantu babiri bananirwa kubana bate? Ni iki umuntu umwe akora kikagera aho undi amubwira ati ‘sinkigushaka, ndagiye’?”
Ihohoterwa rikorerwa mu ngo, ibibazo bishingiye ku mutungo no gucana inyuma ni bimwe mu bivugwa bitera gutandukana kw’ingo.
Iriya raporo ya ‘Rwanda Vital Statistics Report’ y’uyu mwaka ivuga ko 41% za gatanya zabaruwe umwaka ushize ari iz’ingo zitarageza imyaka 10.
Kuri iki kibazo, Perezida Kagame yavuze ko “iyo imiryango myinshi isenyutse icyarimwe, Igihugu kirahagwa”.
