Ikipe y’Igihugu y’umupira w’amaguru ya Senegal y’abakuru yari itegerejwe kuza gukorera imyitozo i Kigali mu Rwanda, birangiye itakije kubera impamvu z’abakinnyi bayo ngenderwaho.
Bimaze iminsi bivugwa ndetse binemezwa n’inzego zibishinzwe ko kuva mu ntangiriro z’umwaka utaha wa 2022, ikipe y’Igihugu y’umupira w’amaguru ya Senegal yagombaga gukorera imyitozo i Kigali mu Rwanda yitegura imikino y’igikombe cya Afurika kizabera muri Cameroun.
Ni amakuru yagiye acicikana ko amakipe y’Ibihugu bya Guinea Conakry na Senegal, zahisemo kuzakorera imyitozo hano mu Rwanda mu buryo bwo kumenyera ikirere bazakiniramo kuko ikirere cyaho cyenda kumera nk’icyo mu Rwanda.
Zimwe mu mpamvu zatumye Senegal ihagarika uruzinduko yagombaga kugirira i Kigali, harimo kuba izabona abakinnyi bayo itinze, bikaba byatumye bafata umwanzuro wo gukora imyitozo iwabo bakazahava bajya muri Cameroun. Byari biteganyijwe ko Senegal na Guinea Conakry zari kuzakina imikino ya gicuti n’amavubi, ubwo bivuze ko hasigaye gahunda ya Guinea gusa kuko yo nta gisibya yamaze no guhabwa impanuro n’Umuyobozi w’Igihugu, Colonel Mamadou Doumbuya wabasabye guharanira ishema ry’Igihugu cyabibarutse.
Nyuma y’aho Senegal isubitse uruzinduko rwayo, biteganyijwe ko ikipe y’Igihugu ya Guinea Conakry igera mu Rwanda kuri uyu wa kabiri mu gitondo. Imikino y’igikombe cya Afurika izatangira tariki 9 Mutarama, igere tariki 6 Gashyantare 2022.
