Amizero
Ahabanza Amakuru Ubuzima

Gusuzuma igituntu byasubiye inyuma ho imyaka 10 bitewe n’icyorezo cya Covid-19

Ku munsi ngarukamwaka wo kwizihiza indwara y’igituntu, Ishami ry’Umuryango w’Abibumbye ryita ku buzima OMS/WHO riravuga ko hagomba kongerwa imbaraga mu rugamba rwo kurwanya igituntu burundu, indwara imaze imyaka myinshi ihitana abantu barenga miliyoni buri mwaka.

Urushinge rw’isaha rwerekeza mu mwaka wa 2022 rurihuta cyane, aho bishoboka ko intego abayobozi b’Isi bari barihaye, y’uko kugeza muri uyu mwaka indwara y’igituntu izaba yaramaze gucika itazagerwaho.

Abayobozi bo mu nzego z’ubuzima bagaragaje ko icyorezo cya COVID-19 cyateje ibibazo by’ingutu bikomereye isi yose, aho cyahagaritse ibikorwa birimo gusuzuma no gutanga ubuvuzi burokora ubuzima ku barwayi b’igituntu.

Philippe Glaziou, ni inzobere mu ndwara z’ibyorezo mu Ishami ry’Umuryango w’Abibumye ryita ku buzima OMS/WHO muri gahunda ishinzwe kurwanya igituntu ku Isi. Avuga ko iki cyorezo cyahungabanije cyane ubuzima n’imibereho, bigira ingaruka mbi ku ngamba zo kurwanya igituntu ku isi.

Avuga kandi ko imibare yaturutse mu bihugu 84 yerekana ko abantu bagera kuri miliyoni imwe n’ibihumbi 400 (1,400,000) babuze uburyo bwo kwivuza mu 2020.

Igituntu ni yo ndwara ya mbere ku isi yandura aho yica abantu bagera kuri miliyoni 1 n’ibihumbi 400 buri mwaka. Abantu bagera kuri miliyari 1 na miliyoni 800, hafi kimwe cya kane cy’abatuye isi yose, basanganywe bagiteri zitera igituntu.

OMS/WHO ivuga ko abantu bagera kuri miliyoni eshatu barwaraga igituntu buri mwaka mbere y’uko COVID-19 itangira. Umuyobozi wa gahunda ya OMS/WHO ishinzwe igituntu ku Isi, Tereza Kasaeva, avuga ko iki cyorezo cyateje igabanuka rikabije ry’umubare w’abantu basuzumwe igituntu ku mugaragaro, n’ubwo atari umubare nyawo wanduye iyi ndwara.

Ikindi asobanura ni uko OMS/WHO itinya ko abantu barenga igice cya miliyoni bashobora kuba barapfuye bazize igituntu mu 2020 kubera ko batashoboye kwipimisha.

Ishami ry’Umuryango w’Abibumbye ryita ku buzima, OMS/WHO rivuga, ko abantu barenga 20 ku ijana ubu ari bo bitabwaho, kandi bakivurwa kurusha mu mwaka wa 2019. OMS/WHO ivuga kandi ko ibihugu bifite icyuho kinini ugereranije harimo Indoneziya, Afurika y’Epfo, Filipine n’Ubuhinde.

VOA

Related posts

Amajyaruguru: Ba Gitifu babiri bafatiwe mu tubari bica icyaka kandi dufunze.

NDAGIJIMANA Flavien

Ikipe ya Arsenal yambara ‘VISIT RWANDA’ yatsinzwe na Manchester City mu minota y’inyongera.

NDAGIJIMANA Flavien

Rutsiro FC itsinze Kiyovu sport iyerekeza ahamanuka

Christian Hakorimana

Leave a Comment