Mu gitondo cya kare kuri uyu wa Gatandatu tariki 07 Werurwe 2026, Igisirikare cya Repubulika ya Demokarasi ya Congo zagabye igitero gikomeye muri santere ya Mushaki no mu nkengero zaho zifashishije za ndege kabuhariwe zitagira abapilote (drones).
Itangazo ryasohowe n’umuvugizi w’Ihuriro AFC/M23, Lawrence Kanyuka yifashishije X, rigaragaza ko iki gitero cyagabwe ahatuwe cyane muri ibi bice byo muri teritwari ya Masisi, intara ya Kivu y’Amajyaruguru, kigahitana abasivili benshi, inzu zabo zirasenywa.
Kanyuka ati: “Saa 05:15, ihuriro ry’ingabo za Leta ya Kinshasa ryarashe ibisasu byinshi kandi bitavangura ku bice bituwe cyane muri Mushaki no mu nkengero. Ibi bitero bigabwa buhumyi, bigabwa hatitawe ku buzima bw’abantu, byishe abasivili benshi b’inzirakarengane, bisenya inzu nyinshi.”
AFC/M23 yafashe santere ya Mushaki mu ntangiriro z’Ukuboza 2023, ikuyemo ihuriro ry’ingabo za DR Congo, iz’u Burundi na Wazalendo. Ni igice cy’ingenzi muri teritwari ya Masisi, kiri mu ntera y’ibikolemetero bibarirwa muri 30 uvuye mu mujyi wa Goma.
Kanyuka yasobanuye ko muri iki gitondo, ihuriro ry’ingabo za Leta ya RDC ryagabye ikindi gitero gikomeye mu gace gatuwe cyane ka Gakenke muri komini Minembwe, kandi ko ibyo biri mu mugambi wo kurimbura Abanyamulenge.
Ibi bitero bikurikiye ikindi cya drone ihuriro ry’ingabo za Leta ya RDC ryagabye mu gace ka Kibanda Mangobo, teritwari ya Walungu mu ntara ya Kivu y’Amajyepfo, ku wa 6 Werurwe.
AFC/M23 yatangaje ko abantu umunani biciwe muri iki gitero, abandi 12 barakomereka, ishimangira ko izakomeza gushyira mu bikorwa inshingano zayo zo kurinda no kurwanirira abasivili bakomeje kwibasirwa.
