Kuri uyu wa Kabiri, tariki ya 11 Ugushyingo 2025, Perezida Paul Kagame yatangiye uruzinduko rw’akazi rw’iminsi ibiri mu gihugu cya Guinée-Conakry, aho yitezweho kugira uruhare rukomeye mu mishinga y’iterambere n’ubufatanye hagati y’ibihugu byombi.
Muri uru ruzinduko, Perezida Kagame ari kumwe na mugenzi we Mamadi Doumbouya wa Guinée, barateganya gutangiza ku mugaragaro umushinga munini wo gutunganya amabuye y’agaciro ya ‘Fer’, uzwi ku izina rya Simandou Iron Ore Project.
Ibirombe bya Simandou, biherereye mu majyepfo y’uburasirazuba bwa Guinée, bizwiho kuba bifite umutungo mwinshi w’amabuye ya Fer, aho abarimu b’abahanga bavuga ko harimo hagati ya toni miliyoni eshatu na miliyoni enye z’aya mabuye.
Umushinga wo kubibyaza umusaruro uteganyijwe kurangira mu mwaka wa 2030, aho uzaba ushobora gutunganya toni zigera kuri miliyoni 120 buri mwaka, bigatuma uba umwe mu mishinga ikomeye y’ubucukuzi bw’amabuye y’agaciro ku Isi.
Ku munsi ukurikiyeho, tariki ya 12 Ugushyingo, Perezida Kagame na Perezida Doumbouya bazatangiza ku mugaragaro Transform Africa Summit (TAS), inama nyafurika izibanda ku iterambere rishingiye ku ikoranabuhanga.
Iyi nama, yateguwe na Smart Africa Alliance, izagaruka cyane ku ruhare rw’ubwenge bw’ubukorano (Artificial Intelligence) mu guhanga udushya tuganisha Afurika ku iterambere rirambye. Abayobozi batandukanye n’inzobere bazaganira ku uko AI ishobora gufasha mu guteza imbere ubukungu, kunoza imiyoborere no kongerera ubushobozi abahanga mu ikoranabuhanga.
